20 тамыз күні Азаттықтың Instagram әлеуметтік желісіндегі аккаунты тағы да бұғатқа түсті.
Бұл туралы желі қолданушылары парақшаның ашылмай қалғанын айтып, дабыл қаққан.
Әлеуметтік желі платформасы Азаттық аккаунтын бұған дейін де екі рет бұғаттап (8 және 10 шілде күндері), оның себебін «авторлық құқық бұзылғаны туралы шағым түсуіне байланысты» деп түсіндірген. Алайда Азаттық контент жариялаған кезде барлық заң талаптарын сақтағанын көрсетіп, дәлел келтіргеннен кейін Instagram-парағы бұғаттан шығарылған.
Бұл жолы да Instagram әкімшілігі Азаттықтың желіде жариялаған контенті платформаны пайдалану ережесіне сай келмейтінін алға тартқан, бірақ нақты қай пост қандай талапқа сай емесін атап көрсетпеген.
Азаттықтың Instagram-аккаунты Қазақстанда жаңа Конституция бойынша жаңа парламент сайлауына санаулы күн қалғанда бұғатталып отыр. «Құрылтай» аталатын бір палаталы парламент сайлауы 23 тамызда өтеді.
