21 қазанда Украина президенті Владимир Зеленский Ресеймен арадағы соғыс қимылдарын қазіргі майдан шебін сақтай отырып тоқтатуға болатынын мәлімдеді. Бұл туралы ол америкалық Fox News телеарнасына берген сұхбатында айтты.
Tengrinews агенттігінің хабарлауынша, сұхбатта телеарна жүргізушісі Зеленскийден соғыс қимылдары қазіргі шекте тоқтатылып, ел аумағының 75 пайызы немесе одан да көп бөлігі Украина бақылауында қалатын бейбіт келісімге қалай қарайтынын сұрады.
«Иә, қазір бізге [майдан шебін] тоқтату қажет. Меніңше, бұл — соғысты аяқтаудың нақты жолы. Президент Трамп айтқандай біз мұны атысты тоқтату немесе адам өлтіруді доғару деп атаймыз», — деп жауап берді Зеленский.
Оның айтуынша, соғыс қимылдарын тоқтату қақтығысты одан әрі реттеудің алғашқы қадамы болуы тиіс.
«Тоқтатып, кідіре тұру керек. Бұл — бүгінде бізге Ресейден қажет ең төменгі талап. Содан кейін біз президент [АҚШ] пен еуропалықтардан қауіпсіздік кепілдігін сұраймыз», — дейді Зеленский.
Осыған байланысты Ресей президентінің көмекшісі Юрий Ушаков мәселенің өз пайдаларына шешіле бастағанын аңдатқан.
Бұл мәлімдеме Ресей президенті Владимир Путин мен АҚШ президентінің арнайы өкілі Стив Уиткоффтың Санкт-Петербургтегі кездесуінен кейін жасалып отыр.
Ушаковтың айтуынша, Ресей тарапы қарашаның ортасында Украина және АҚШ-пен үшжақты келіссөздерді қайта бастауға дайын екенін білдірген. Келіссөз мекені ретінде Абу-Даби аталады.
