Қазақстан президенті Қасым-Жомарт Тоқаев елдің 2020-2030 жылдарға арналған сыртқы саясат концепциясын өзгертті. Атап айтқанда, тұжырымдамадағы экс-президент жайлы тұстар алынып тасталды.
Бұл туралы «Ақжайық» сайты хабарлады.
Тұжырымдаманың бұрынғы нұсқасында «ел дамуының жаңа кезеңіндегі Қазақстан Республикасының Тұңғыш Президенті – Елбасы Н.Ә. Назарбаевтың сыртқы саяси бағытының сабақтастығы» елдің сыртқы саясатындағы негізгі қағидаттың бірі болған еді. Ал жаңа нұсқада «ел дамуының жаңа кезеңінде сыртқы саяси бағыттың сабақтастығы» деп жазылған.
Бұған қоса, Назарбаевтың сыртқы саясат бойынша халыққа мәлімдеме жасау құқығы да алынып тасталған. Бұрынғы құжатта «Тұңғыш президент – Елбасы» Конституциялық заңына сай, Қазақстанның бірінші президенті – Елбасы сыртқы саясат бойынша маңызды сұрақтарда халыққа, мемлекеттік органдарға және лауазымды тұлғаларға қайырылып, бастама көтеруге өмір бойына құқылы» деп жазылған еді.
238 адамның өмірін қиған Қаңтар оқиғасынан соң Назарбаев пен оның айналасындағылардың ықпалы әлсіреді. Назарбаев Қауіпсіздік кеңесін өмір бойына басқару өкілетінен біржолата айрылды. «Тұңғыш президент – Елбасы» туралы заң күшін жойды. Экс-президент қоғам алдына сирек шығады. Сайлау, рефрендум тәрізді дауыс беру науқанында көп алдына шыға қалса, ол қазіргі президенттің бағыт-бағдарын қолдайтынын айтады.
