Құрылтай сайлауының қарсаңында тағы бір саяси партия — «Ауыл» партиясының кезектен тыс съезі өтіп, Серік Егізбаев «Ауыл» партиясының төрағасы қызметінен кететінін мәлімдеп, орнына жаңа үміткер ұсынды.
Kazinfiorm агенттігінің хабарлауынша, Серік Егізбаев партияның және оның болашағының мүдделерін басшылыққа алатынын атап өткен.
«Бүгінгі саяси сәт барлық прогрессивті күштерден қоғамның жаңару туралы сұранысына лайықты жауап беруді талап етеді. Бұл сұраныс конституциялық реформа барысында дәлелденді. «Ауыл» партиясы осы үдерістерден шетте қала алмайды, керісінше, партия олардың белсенді қатысушысы, ал бұл үшін аграрлық және әлеуметтік күн тәртібіне жаңа көзқарастар әкелуді, жаңартылған саяси жүйеде тиімді жұмыс істеуді қажет етеді. Сондықтан партия төрағасы қызметімді тоқтатуым партияның ішкі динамикаға дайындығын және жаңа саяси жүйеде алдағы сайлауға толыққанды қатысуға ниеттілігін көрсететін заңды қадам болады»,- деген Серік Егізбаев.
Ол съездің қарауына партия төрағасы ретінде осы ұйым басшысының орынбасары Қайрат Айтуғановтың кандидатурасын ұсынған.
Қайрат Қапарұлы — аграрлық экономика, мемлекеттік қызмет және ғылыми салада 40 жылдан астам еңбек өтілі бар жоғары білікті басшы, экономист және мемлекет қайраткері. Әр жылдары ауыл шаруашылығы бірінші вице-министрі, аппарат басшысы, сондай-ақ Халықаралық қайта құру және даму банкі жүзеге асырған жобаның жетекшісі, «Оңтүстік» әлеуметтік-кәсіпкерлік корпорациясының» басқарма төрағасы, Қарағанды облысы әкімінің орынбасары, «ҚазАгро» ұлттық басқарушы холдингі» АҚ басқарма төрағасының орынбасары, «Кәсіподақтар федерациясы» республикалық қоғамдық бірлестігінің төраға орынбасары. Сонымен қатар, «Ұлттық аграрлық ғылыми-білім беру орталығы» КЕАҚ директорлар кеңесінің төрағасы, сондай-ақ С. Сейфуллин атындағы Қазақ агротехникалық университетінің басқарма төрағасы қызметтерін атқарған.
Съезд делегаттары Қайрат Айтуғановтың «Ауыл» партиясының жаңа төрағасы болып сайлануын бірауыздан қолдаған.
Елде 1 шілдеде күшіне енетін жаңа Конституция бойынша бір палаталы парламент — құрылтай сайлауы тамыз айында өтеді. Бұған дейін биліктегі «Аманат» партиясы жаңадан құрылған «Әділет» партиясына қосылған. Ал «Ақ жол» партиясы да өз төрағасын ауыстырған. Парламентте билік партиясынан басқа саяси ұйымдардың үні бәсең естіледі.
