15 маусым күні Алматының Алмалы аудандық соты ҚазТАГ агенттігінің бас редакторы Әмір Қасеновті үйқамақтан тергеу абақтысына ауыстыруды сұраған прокурордың өтінішін орындады. Шешім Қасенов пен агенттік бас директоры Әсет Матаевқа қатысты іс бойынша тыңдауда қабылданды.
Азаттық радиосының сотқа сілтеп хабарлауынша, Қасенов үйқамақ шарттарын бұзып, қаралып жатқан іс жөнінде әлеуметтік желілерде бірнеше бейнеүндеу жариялаған делінеді. Сот оны 11 маусымға белгіленген сот отырысына келмеген деп отыр. 2025 жылғы желтоқсаннан бері үйқамақта отырған оған байланыс құралдарын пайдалануға тыйым салынған-ды.
Қасенов пен Матаевқа қарсы іс Freedom Finance компаниясының шағымынан кейін қозғалған. Компания ҚазТАГ жариялаған материалдарды жалған ақпарат деп санайды, ал агенттік бұл қудалауды өз қызметіне жасалған қысым ретінде бағалайды.
