«Шекарасыз репортерлар» (RSF) халықаралық ұйымы баспасөз бостандығының жыл сайынғы рейтингін жариялады, оған сәйкес Қазақстан 100-ден 34,41 ұпай жинап, 149-орынға ие болды. Бұл туралы ҚазТАГ агенттігі хабарлады.
«Индекс 2026. 180 елдің ішінде 149-орын. Бағалау: 34,41», — делінген RSF рейтингінде.
Осылайша, Қазақстан 2025 жылмен салыстырғанда сегіз позицияға төмендеді – ол кезде ел 141-орында болған.
«Онлайн-жаңалықтардың сапасы жақсарғанымен, баспасөзге қысым жаңаша сипат алуда: тәуелсіз медиа өз пікірін білдіре алатын жалғыз кеңістік – интернетке бақылау күшейіп келеді», — деп көрсетілген есепте.
Көршілес елдер арасында Қырғызстан 146-орында, Өзбекстан 147-орында, Тәжікстан 155-орында орналасқан.
Посткеңестік елдер арасында ең нашар нәтижені Түрікменстан көрсетіп, 173-орынға (23,06 ұпай) табан тіреді. Одан сәл жоғары Ресей орналасты – 23,15 ұпаймен 172-орын. Ресейдің алдына Беларусь (165) пен Әзірбайжан (171) шықты.
Түрікменстаннан төменгі орындарға Вьетнам, Ауғанстан, Сауд Арабиясы, Иран, Қытай, Солтүстік Корея және Эритрея жайғасқан.
Баспасөз бостандығының деңгейі ең жоғары елдердің үштігіне Норвегия, Нидерланды және Эстония кірген.
Баспасөз қорғау ұйымының айтуынша, Қазақстанда журналистер заңнамалық тұрғыдағы қысым ғана емес (мысалы, Қылмыстық кодекстегі бұлыңғыр жазылған «Көрінеу жалған ақпарат тарату» бабымен қудалау), сонымен бірге аңду, қорқыту, кейбір жағдайда ұстау немесе үйқамаққа жіберу сияқты түрлі тосқауылдарға кезігіп отыр.
Қазақстан халықаралық ұйымның бұл есебіне әзірге реакция білдірмеді.
