Энергетика министрі Ерлан Ақкенженов қазақстандық мұнайды «Дружба» құбыр желісі арқылы Германияға айдаудың тоқтатылғаны туралы ақпаратты мойындады. Бұл туралы ҚазТАГ агенттігі хабарлады.
«Мен бұл ақпаратты бейресми дереккөздерден алдым. Ресей тарапынан әзірге ресми мәлімдемелер болған жоқ, бірақ бейресми дереккөздер арқылы бұның шындық екенін біліп отырмыз. Мамыр айында Атырау-Самара арқылы әрі қарай «Дружба» мұнай құбырымен «Швед» зауытына бағытталатын транзит бізде – нөл», — деді Ақкенженов Астанада өтіп жатқан 2026 жылғы Өңірлік экологиялық саммиттің кулуарында.
Министрдің айтуынша, қазақстандық мұнайды айдауды тоқтатудың бейресми себебі ретінде «техникалық мүмкіндіктің болмауы» аталуда.
«Бұл, бәлкім, жақында Ресей инфрақұрылымына жасалған соққылармен байланысты болуы мүмкін. Мен осындай болжам жасап отырмын», — деп нақтылады энергетика министрлігінің басшысы.
Министрдің ақпаратынша, шектеулер әзірге тек 2026 жылдың мамыр айына қатысты, техникалық мәселе шешілген бойда қазақстандық мұнай транзиті қайта жанданады.
Бұл ретте Қазақстан 2026 жылы мұнай өндіруді қысқартуды жоспарлап отырған жоқ.
«Бізде бұл көлемді басқа бағыттар бойынша қайта бөлуге мүмкіндік бар», – деп мәлімдеді Ақкенженов.
Қазақстан премьер-министрінің бірінші орынбасары Роман Скляр да аталған бағыт ел үшін аса маңызды емес екенін мәлімдеді.
Шенеуніктер Ресей тарапынан ресми хабарлама күтіп отырғандарын атап өтті.
Бұған дейін Reuters агенттігі Ресейдің «Дружба» құбыр желісі арқылы Германияға қазақстандық мұнай айдауды тоқтататынын хабарлаған болатын.
