Қазақстан Ұлттық қауіпсіздік комитеті 13 қыркүйекте өздерінің Астанада өтіп жатқан 5-Дүниежүзілік көшпенділер ойыны қауіпсіздігін қамтамасыз етуге қатыспағанын мәлімдеді. Бұл туралы комитеттің ресми сайтында жарияланды.
«2024 жылғы 12 қыркүйекте БАҚ-та және әлеуметтік желілерде Қырғызстан құрамасының көкпар ойыншысына ҰҚК қызметкері қысым көрсеткені туралы ақпарат таралды. Бұл ақпарат шындыққа сәйкес келмейді» делінген мәлімдемеде.
Осы мәліметке қарағанда, ҰҚК қызметкерлері 5-Дүниежүзілік көшпенділер ойындарын өткізу барысында қоғамдық тәртіпті қамтамасыз етуге қатысқан жоқ. «Тек ресми ақпарат көздеріне сенуге шақырамыз», — делінген ҰҚК мәлімдемесінде.
Бұдан алдын Қазақстан мен Қырғызстан көкпар командалары арасында дау туындап, қауіпсіздікті қамтамасыз етуші жасақтың бірі Қырғызстан ойыншысын тәртіпке шақырған.
