19 қыркүйекте президент Қасым-Жомарт Тоқаев Астанада «Таза Қазақстан» акциясына қатысушылар алдында сөз сөйледі. Сондайда ел басшысы ел ішіндегі, яғни ірі немесе шағын қалалардан тысқары жолдардың сапасына баса назар аудару керектігін баса айтты.
«Бұл — біздің ең осал тұсымыз, оны мойындаған жөн. Мұны ешкім шеше алмады немесе шешуге құлық танытпады. Масқара жағдай. Оны саботаж деуге болады. Заң аясында қатаң шаралар қолданамыз», — деп атап өткен президент.
Ел басшысы осы сөзінде Астана әкімі Жеңіс Қасымбекке ғимараттардың қабырғасына граффити салатын тұлғаларға қатысты қатаң шара қолдануды тапсырды. Президенттің айтуынша, қалаларда бұған жол бермеу керек, әлемде вандализм мен бұзақылықтың сорақы көрінісі саналатын, қоғамдық орындарды бүлдіретін «шығармашылықтың» мұндай түріне толық тыйым салатын заңдық-нормативтік шаралар қабылдаған жөн.
Президент әділетті, қауіпсіз, озық және таза Қазақстанды құруды қастерлі парыз ретінде атап, адамдарды осы жолда белсенді жұмыс істеуге шақырды.
«Қасиетті Отанымызды дамытудың бұдан басқа жолы жоқ. Бәріміз адал, шыншыл және жауапты да болуымыз қажет. Кейбір уақытта байқалмай айтылған сөздердің зияны басқа әрекеттерге қарағанда әлдеқайда қауіпті болады. Соны ешқашан ұмытпаңыздар. Әрқашанда еліміз туралы ойлап, Қазақстанға қамқоршы болыңыздар», — деген президент «Таза Қазақстан» акциясына қатысушылар алдында сөйлеген сөзінде.
