Соңғы аптада 50-ден астам автокөлік жанармай сапасына байланысты бірдей ақаулармен Viton.kz автосервисіне жүгінген. Бұл туралы ҚазТАГ агенттігі хабарлады.
«Соңғы аптада бізге 50-ден астам көлік бірдей мәселемен келді: отын қоспасы жетіспейді, чек жанып тұр, көлік жүрмейді, форсункалар жарамсыз болып қалған. Біреуде поршеньдер күйіп кетсе, біреуде форсункалар жай ғана бітеліп калған. Қазір біз бұл форсункаларға қызмет көрсетіп жатырмыз, күніне 15 көліктен келеді және WhatsApp-қа 100-ден астам өтініш түседі. Неліктен бұлай болып жатқанын білмеймін, Қазақстанға сапасыз отын келген сияқты», – деп хабарлайды Viton.kz автосервисі.
Бұған дейін энергетика министрі Ерлан Ақкенженов бензин сапасына қатысты жағдайға түсініктеме берген болатын. Оның айтуынша, жанармай құю станциясы (ЖҚС) желілері мұнай өңдеу зауытындағы мәселелерді көрсетіп отыр, ал зауыт ЖҚС тарапынан бұзушылықтарға жол берілетінін алға тартады. Министр сондай-ақ жанармай құю станцияларына Атырау мұнай өңдеу зауытынан бензиннің алмастырушы партиялары жеткізілгенше күте тұруға шақырған.
Сондай-ақ сауда және интеграция министрлігі бензин сапасына бүкіл тізбек бойынша – өндірістен бастап ЖҚС-қа дейін зертханалық зерттеулер жүргізіп жатқаны айтылған.
Құрылтайдың алғашқы жалпы отырысында ЖСДП депутаты Асхат Рақымжанов сапасыз жанар-жағар май мәселесін көтерген. Депутаттың дерегінше, Алматыда АИ-100 ретінде күкірт мөлшері үш еседен астам жоғары өнім сатылған, ал Қызылорда облысында АИ-95 маркасымен АИ-92 бензині сатылған.
