Құрылтай жанынан қоғамдық палата құру мақұлданды. Бұл туралы 16 қыркүйекте парламенттің баспасөз қызметі хабарлады.
«Құрылтай отырысында бірінші шақырылымдағы Қазақстан Республикасы құрылтайының жанынан қоғамдық палата құру туралы шешім қабылданды. Қоғамдық палата депутаттардың сарапшылармен, ғалымдармен, азаматтық қоғам, кәсіби бірлестіктер және өңірлер өкілдерімен тікелей өзара іс-қимыл жасайтын тұрақты жұмыс алаңына айналуға тиіс. Оның құрамына 50 адам енгізу көзделіп отыр», — делінген ресми хабарламада.
Палатаның негізгі міндеттерінің бірі заң жобаларын «нөлдік оқылым» сатысында қоғамдық және сараптамалық зерделеу екені айтылған.
«Бұл заң жобаларын әзірлеу кезеңінде кәсіби ұсынымдарды, балама ұстанымдар мен ұсыныстарды ескеруге мүмкіндік береді. Қоғамдық палата алаңында еліміздің қоғамдық-саяси және әлеуметтік-экономикалық дамуының өзекті мәселелері де талқыланады. Алдағы уақытта құрылтай бюросы қоғамдық палата туралы ережені бекітіп, оның құрамын айқындауға және басшылық лауазымдарға тағайындау жүргізуге тиіс», — делінген хабарламада.
Қазақстанда қос палаталы парламент тараған соң бір палаталы парламент — құрылтай сайланған. Алда халық кеңесін құру көзделген. Ал құрылтай қанатының астынан құрылмақ қоғамдық палата туралы бұрын айтылмаған.
