Президент Қасым-Жомарт Тоқаев «Қазақ тілін дамыту – елде өзге тілдердің дамуына кедергі келтіру емес», «тілдерді бір-біріне қарсы қою – үлкен күнә, оның салдарын көріп жатырмыз» деп мәлімдеді.
Бұл туралы Азаттық радиосы хабарлады.
Мәліметке қарағанда Қазақстан басшысы бұл туралы 10 қарашада Астанада өткен «Қазақ тілі» қоғамының құрылтайында айтты.
Бұған қоса, ол «тілдерді пайдаланып жанжал жасағысы келетін арандатушылар өте қауіпті істерімен айналысып жүр» деп, «оларды «Заң мен тәртіп» қағидасымен жауапкершілікке тарту керек» деді.
«Осы жерде тағы да қайталап айтқым келеді: кез келген тілге қарсы шығу – Жаратқанның адамға берген нығметіне қарсы шығумен бірдей… Біз қазақ тілін ең алдымен бірлік пен ынтымақ тілі ретінде дамытуымыз керек. Ана тіліміз жаһан жұртшылығына тартымды тіл болуы керек,»- деді ол жиында.
Қазақстанда қазақ тілі мен орыс тіліне қатысты дау оқтын-оқтын болып тұрады. Тұтынушылар қазақ тілінде қызмет көрсетпеген, қызметшілері орысша сөйлеген бизнес орындарына бірнеше рет бойкот жариялаған.
2025 жылы клиенттердің бірі «Магнум» сауда желісінің курьері қазақша сөйлеуді талап етті деп шағымданған соң «Магнум» қызметкерін жұмыстан шығарып жіберген. Осыдан соң жұрт «Магнум» сауда желісінен тауар алмай бойкот жариялаған. Бұған қоса, Астанада қазақ тілінде меню беруден бас тартқан Qazaq Coffee кофеханасы да кәнсілге ұшырап, кейін жабылған.
Биыл елде жаңа Конституция қабылданғанда да жұрт қазақ тілі мен орыс тілінің статусына қатысты талқы туғызған. Қоғамдағы шудан соң Конституция жобасындағы «орыс тілі қазақ тілімен тең қолданады» деген ереже «орыс тілі қазақ тілімен қатар қолданады» деп өзгертілген еді.







