5 қазанда Президент Қасым-Жомарт Тоқаев қорғаныс министрлігін кешенді тексеру комиссиясы мүшелерімен кеңес өткізді.
Комиссия төрағасы, қауіпсіздік кеңесі төрағасының орынбасары Аида Балаева алдын-ала қорытынды туралы баяндады. Ресми мәліметке қарағанда, Каспий теңізіндегі қайғылы оқиға салада қордаланған жүйелік проблемаларды әшкерелегені айтылған. Әскери іс-шараларды жоспарлау кезінде өрескел қателіктер жіберілгені, бұған дейінгі басшылықтың тиісті қадағалау жасамағаны аталды.
Тексерістің бірінші кезеңінің қорытындысы бойынша қылмыстық қудалау органдары мемлекет мүлкін талан-таражға салу, қызметін асыра пайдалану фактілеріне қатысты және министрлікке қарасты ұйымдар мен құрылымдық бөлімшелер қызметіндегі заңға қайшы әрекеттер үшін 13 қылмыстық іс қозғалған.
Каспийдегі қасіретті тергеуде оқу-жаттығу және жоспарлау кезінде қатерді бағалау, десант түсіруді ұйымдастыру және әскерилердің қауіпсіздігін қамтамасыз етуге қатысты кемшіліктерге жол берілгені анықталған. Қолбасшылық құрамның салғырттығы бойынша тергеу жүріп жатыр. Бес лауазымды тұлға тұтқындалған.
Ақордадағы жиында әскердегі әлімжеттік жайлы айтылғаны назар аудартады.
5 қазанда президент қорғаныс министрлігін кешенді тексеру комиссиясының мүшесі, жоғары аудиторлық палатаның төрағасы Әлихан Смайыловты жеке де қабылдаған. Онда кешенді тексеру 50 нысанды, оның ішінде 48 әскери бөлімді қамтитыны айтылған.
Бұл комиссия 26 қыркүйекте құрылған. Тексеру 24 қыркүйекте Каспий теңізіндегі әскери оқу-жаттығу кезінде 14 теңізшінің қазасынан кейін басталған.
