Ресей президенті Владимир Путин 22 қазанда Ресей Украинадағы жағдайды шешу бойынша келісімге келуге дайын және онымен соғысқысы келмеді деп мәлімдеді. Бұл туралы Азаттық радиосы хабарлады.
“Ресей Украинамен соғысқысы келмейді. Бірақ бүгінгі украин билігі соғысқысы келсе, соғыса берсін,”- деген Путин.
Айтуынша, осы аптада АҚШ өкілдерімен келіссөз кезінде үшжақты байланысты қалпына келтіру жөнінде келісім жасалған.
«Бұл келіссөздің мақсаты — бейбіт келісімге қол жеткізілгеннен кейін Украина мен Ресейдің қауіпсіздігін қамтамасыз ету мәселесін талқылау», — дейді ол.
Ресей басшысы дегенмен келісім ұрыс қимылдарын қысқа мерзімге тоқтатумен шектелмей, түпкілікті сипатта болуы керегін айтты. Осылайша Путин уақытша бітім орнатудан гөрі мүддесі әріде жатқанын тағы да аңдатып отыр.
Ресей басып алған аумақтың бір бөлігінен Киев бас тартқан жағдайда бейбіт келісімге қол жеткізу мүмкіндігі туралы сұраққа жауап берген Путин Мәскеу көздеп отырған Украинаның шығысындағы аумақтарды «тарихи тұрғыдан Ресейге тиесілі жерлер» деп атады.
«Біріншіден, менің бұл мәселеге көзқарасым мынадай: бұл — олардың жері емес. Бұл — тарихи тұрғыда Ресейдің аумағы… Сондықтан қандай да бір аумақтық шығын туралы айту орынсыз деп ойлаймын», — деген Ресей басшысы.
Бұдан алдын 21 қазанда Украина президенті Владимир Зеленский Ресеймен арадағы соғыс қимылдарын қазіргі майдан шебін сақтай отырып тоқтатуға болатынын мәлімдеген. Қазіргі шеп Украинаның 25 пайыздай жерінен айрылған тұсқа дөп келеді.
