Президент Қасым-Жомарт Тоқаев халық кеңесінің құрамын бекіткен жарлыққа және оның бірінші сессиясын шақыру туралы өкімге қол қойды. Ресми мәліметке қарағанда, 126 адамнан тұратын халық кеңесі құрамы бекіп, оның алғашқы жиыны 23-24 қыркүйек күндері ел астанасында өтеді.
126 адамдық халық кеңесінің құрамында назар аудартатын мынандай тұлғалар байқалған. Мүшелер арасында бұған дейін мәжіліс және сенат депутат болған Мұрат Әбенов, Ермұрат Бапи, Аманжол Әлтай, Еділ Жаңбыршин, Нұртөре Жүсіп, Нұртай Сабильянов, Геннадий Шиповских бар. Және ірі бизнесмендер Гаджи Гаджиев, Геннадий Зенченко, Андрей Лаврентьев, Шахмұрат Мүтәліп, Жұмабек Жанықұлов та халық кеңесіне енді. Бұдан өзге мүешелердің ішінде мынандай тұлғалар да назар аудартады.
Бағдат Мусин, «Қазақтелеком» басшысы
Бауыржан Омаров, жазушы, Қазақстан президентінің кеңесшісі
Ерқанат Көпжасарұлы, «Қазақстан» телеарнасының журналисі
Алмас Алтай, билік саясатын қолдайтын блогер
Рауан Кенжеханұлы, «Әділет» партиясының саяси бюросының мүшесі
Ислам Байрамуков, грек-рим күресінен Сидней-2000 олимпиадасының күміс жүлдегері
Әлия Юсупова, көркем гимнастикадан Азия ойындарының чемпионы, жаттықтырушы
Юрий Мельниченко, грек-рим күресінен Атланта-1996 олимпиадасының күміс жүлдегері
Роза Мұқанова, жазушы, драматург
Мерей Қарт, ақын
Ольга Спирина, тележүргізуші
Президент Тоқаев биылғы жазда халық кеңесін билік пен халық арасында диалог орнататын консультативті орган ретінде құрған. Жаңа Конституцияда бұл нысан «халық мүддесін білдіретін жоғарғы орган» ретінде аталған. Кеңестің барлық 126 мүшесін президент тағайындайды. Халық кеңесі мемлекеттің ішкі саясатының негізгі бағыттары бойынша ұсыныстар мен ұсынымдарды әзірлейді, заң жобаларын ұсынып, референдум тағайындау туралы бастама көтере алады.
Қаржы министрлігі халық кеңесінің жұмысына жылына 1,7 млрд теңге бөлінетінін, мүшелеріне жалақы берілетінін айтқан.
Әзірге кеңестің хатшылығы мен төралқа мүшелері туралы жарияланған жоқ.
Қазақстан халық ассамблеясы мен ұлттық құрылтай орнына халық кеңесін құруды президент ұсынған. Ол биыл ұлттық құрылтайдың Қызылордада өткен соңғы жиынында осы туралы жариялаған.
