Президент Қасым-Жомарт Тоқаев Құрылтайдың ашылуына қатысып, алғашқы сессиясына ақжол тіледі. Ел басшысы бір палаталы жаңа парламенттің төрағасы лауазымына «Әділет» партиясының төрағасы Айбек Дәдебайды ұсынды.
Президент жиынның ашылуында 45 минуттай сөз сөйледі.
«Жаңа Конституцияға сәйкес билік институттарын жасақтау жұмысын бастау үшін біз бірқатар рәсімді өткізуіміз керек. Ең алдымен, Құрылтайдың басшылық құрамын сайлап, құрылымын қалыптастыру қажет. Өздеріңізге мәлім, Конституцияның 57-бабына сәйкес Құрылтай төрағасының лауазымына кандидатураны президент ұсынады. Мен жауапкершілігі зор бұл лауазымға Айбек Арқабайұлы Дәдебайдың кандидатурасын ұсынамын. Сіздер бұл тұлғаны жақсы білесіздер. Ол мемлекеттік басқару жүйесінде көп жыл қызмет етті. Тәжірибесі мол деп айтуға болады. Өзінің білімді, отаншыл, адал азамат екенін нақты істерімен дәлелдеді. Сондықтан оны осы лауазымға лайық деп санаймын. Құрылтай депутаттарынан Айбек Арқабайұлы Дәдебайдың кандидатурасын қолдауды сұраймын,» — деген Қасым-Жомарт Тоқаев.
Президент ұсынған тұлға соңғы жылдары Қасым-Жомарт Тоқаевтың кеңсесінде түрлі қызмет атқарған. Соңғы қызметіне дейін көпшілікке танымал болмаған адам.
Айбек Дәдебай 2001 жылы Абылай хан атындағы Қазақ халықаралық қатынастар және әлем тілдері университетін тәмамдаған. 2003 жылы осы ЖОО-ның магистратурасын «аймақтану магистрі» мамандығы бойынша аяқтаған.
Сонымен қатар, 2001-2002 жылдары Қазақ халықаралық қатынастар және әлем тілдері университеті Халықаралық туризм менеджменті кафедрасының оқытушысы болды.
2008-2011 жылдары Сенат аппаратының парламентаралық байланыстар және халықаралық ынтымақтастық бөлімінің сарапшысы, Сенат төрағасы көмекшісінің міндетін атқарушы.
2011-2013 жылдары Қазақстанның БҰҰ-дағы Тұрақты өкілдігінің үшінші хатшысы, атташе.
2013-2019 жылдары Сенат төрағасының хатшылығы меңгерушісінің орынбасары, кейіннен – меңгерушісі.
2019-2021 жылдары Президент кеңсесі бастығының орынбасары.
2021 жылдың мамыры – 2022 жылдың қаңтар аралығында Президент іс басқарушысының орынбасары.
2022 жылы – Президенттің іс басқарушысы. 2024 жылы Президент әкімшілігінің басшысы болды.
Ал 2026 жылдың мамыр айынан бері Айбек Дәдебай – билікшіл «Аманат» партиясының орнына құрылған «Әділет» партиясының төрағасы.
