23 қыркүйекте Тегеранда Каспий теңізі жағалауындағы мемлекеттердің жоғары лауазымды өкілдерінің қатысуымен конференция өтеді.
Бұл туралы Иран сыртқы істер министрінің орынбасары Казем Ғарибабади хабарлады.
«Жағалау маңындағы елдер өкілдерінің Тегеранда келуі өзара мүдделі мәселелерді талқылау, екіжақты және көпжақты байланыстарды нығайту, пікір алмасу және болашақта сындарлы өзара іс-қимылдың негізін қалау үшін тамаша мүмкіндік бола алады. Біз бұл қатысуды Каспий дипломатиясын нығайту үшін пайдалануымыз керек», — деген ол.
Бұдан алдын Иранның Қазақстандағы елшісі Әли Акбар Джоукар аталмыш жиынның Тегеран конвенциясының 20 жылдығымен тұспа-тұс келетінін хабарлаған болатын. Жиында Каспий теңізінің экологиялық жағдайы талқыланбақ. Сарапшылар теңіз деңгейінің төмендеуі жалғасып жатқанын және ғасырдың соңына дейін 8-21 метрге төмендеуі мүмкін екенін ескертеді. Бұл қоршаған ортаға, балық шаруашылығына және жағалау инфрақұрылымына қауіп төндіреді.
Биыл қол қойылғанына 20 жыл толған Тегеран конвенциясы аймақтағы негізгі халықаралық келісімнің бірі ретінде аталады.
Каспий теңізі — бірегей, жабық экожүйе. Оның биологиялық түрлерінің жартысына жуығы әлемнің басқа ешбір жерінде кездеспейді. Мұнда 100-ден астам балық түрі мекендейді, оның ішінде бағалы бекіре балықтары, сондай-ақ Қызыл кітапқа енген сирек кездесетін Каспий итбалығы да бар.
Каспий маңы елдерінің Тегерандағы саммиті қарсаңында Иран 2018 жылы қол қойылған Каспий теңізінің құқықтық мәртебесі туралы конвенцияны ратификациядан өткізуі мүмкін. Жағалаудағы басқа елдер бұл конвенцияны ратификациядан өткізіп, қуаттап қойған. Әзербайжан, Иран, Қазақстан, Ресей және Түркіменстан Каспий теңізімен шектеседі. 12 тамыз Каспий теңізінің халықаралық күні ретінде бекітілген.
