Каспий құбыр консорциумы (КҚК) осы аптада қауіпсіздік мәселесі мен танкер тапшылығына байланысты мұнай тиеуді бірнеше рет уақытша тоқтатуға мәжбүр болған.
Reuters агенттігінің бірнеше ақпарат көзіне сүйеніп хабарлауынша, Қазақстан мұнайын Новороссийск арқылы экспорттау шілденің ортасынан бері іркіліп тұр. Ал әлемдік нарыққа шығатын мұнайдың шамамен 1,8 пайызы КҚК арқылы жөнелтіледі. Reuters дереккөздерінің айтуынша, КҚК қысқа уақытқа ғана жұмысын қалпына келтіріп, кейін қайта тоқтаған. Дрон шабуылдары қаупіне байланысты кеме иелері Новороссийск терминалына танкер жіберуге сақтық танытып отыр.
Алайда мұның алдында Қазақстанның энергетика министрлігі КҚК жұмысын толық тоқтату қарастырылмағанын мәлімдеген. Reuters осыған қатысты Қазақстан билігіне сауал жолдағанымен, Астана әзірге жауап бермеген.
Агенттік дерегінше, экспорттағы қиындықтар Қазақстандағы мұнай өндірісіне де әсер етіп отыр: шілдеде өндіріс көлемі маусыммен салыстырғанда 14 пайыз төмендеген. Бұған қоса, Теңіз кен орнының операторы тамызда шамамен 100 мың тонна мұнайды Грузияның Батуми портына теміржолмен жөнелтуді жоспарлап отыр.
КҚК-дегі іркілістер аясында қазақстандық CPC Blend мұнайы Brent бағасынан барреліне шамамен 4 долларға төмен саудаланған.
