Ресей президенті Владимир Путин елден кеткен және саяси астары бар айыптар тағылып сырттай сотталған я әкімшілік жауапқа тартылған ресейліктердің құқығын шектейтін заңға қол қойды. Құжат 4 тамыздан бастап күшіне енді.
Азаттық радиосы хабарлағандай, жаңа заң бойынша мұндай азаматтардың шетелдік паспорт алу, «Мемлекеттік қызметтер» порталын пайдалану, Ресейдегі мүлкі мен қаржысына иелік ету құқығы шектеледі. Сондай-ақ олар консулдық қызметтердің басым бөлігін пайдалана алмайды, ал банк шоттары мен мүлкі бұғатталады.
Шектеулер Ресей армиясының «беделіне нұқсан келтірген», Ресейге қарсы санкция салуға шақырған, аумақ тұтастығына қол сұғуға бағытталған іс-әрекет жасаған деп айыпталған, «шетел агенттері» мен «қалаусыз ұйымдар» тізіміне алынған азаматтарға да қолданылады.
Заңгерлер мен құқық қорғаушылар бұл құжатты «іс жүзінде азаматтықтан айыратын заң» деп бағалады.
