Армениядағы парламент сайлауында іс басындағы премьер-министр Никол Пашинянның «Азаматтық келісім» партиясы жеңіске жетті. Сайлау бюллетеньдері толық саналғаннан кейін оның 49,81 пайыз дауыс жинағаны жарияланды.
Пашинян басқаратын «Азаматтық келісім» партиясына 727 мың 160 сайлаушы дауыс берген. Бизнесмен Самвел Карапетянның «Күшті Армения» оппозициялық блогы — 23,29 пайыз, ал бұрынғы президент Роберт Кочарянның «Армения» блогы — 9,94 пайыз, бизнесмен Гагик Царукянның «Өркендеген Армения» партиясы — 4 пайыз дауыс жинаған. Қалған партиялар мен блоктар сайлану шегінен өте алмаған.
Президент Тоқаев Армения премьер-министрі Никол Пашинянды оның «Азаматтық келісім» партиясының сайлаудағы жеңісімен алғашқылардың бірі болып құттықтады. Ол Никол Пашинянның Армения елінің ұзақмерзімді ұлттық мүддесі жолындағы қызметте табысқа жете беруіне тілектестік білдірді.
«Президент Қазақстан достас Армениямен барлық салада өзара мүддеге сай белсенді ынтымақтастықты жалғастыруға дайын екенін атап өтті. Қасым-Жомарт Тоқаев армян халқына мемлекеттілікті дамытуда сәттілік, бейбітшілік пен бақ-береке тіледі», — делінген Ақорда жариялаған құттықтауда.
Пашинянды сайлаудағы жеңісімен Еуропа елдерінің басшылары да құттықтап жатыр. Ресей жағы әзірге құттықтаушылар қатарында жоқ.
