4 маусымда Жаңаөзенде “Өзенмұнайгаздың” БЖБ мекемесінің жұмысшылары қамаудағы белсенді Мұратбай Жұмағалиевті қолдап, бір сағатқа жұмысты тоқтатты.
Бұл туралы Азаттық радиосы хабарлады.
Желіде жариялаған видеода ондаған жұмысшының жиналып тұрғаны көрінеді. Ортада сөйлеп тұрған адам президент Қасым-Жомарт Тоқаевқа үндеу жариялап, белсендіге “әртүрлі құйтырқы әрекеттермен жалған айып тағылып” абақтыға қамалғанын айтады.
“Мұратбайдың осы күнге дейін жасап келген белсенділігі осы күнге дейін жасап келген әділдігі далада қалды деп ойлаймын. Бұл іс әркімнің басына келмейтіндігіне кім кепіл?!”- деген жұмысшылардың бірі көпшілік атынан белсендіні босатуды талап етті.
Сонда болған жұмысшылардың бірінің Азаттыққа айтуынша, видео 4 маусымда кешкі сағат 18.30 шамасында мекеме алдында түсірілген. Оның сөзінше, осыдан кейін қалалық прокурор мекемеге келіп, бірнеше жұмысшымен “әңгімелескен”.
Жаңаөзен қаласының прокуратурасы әзірге бұған қатысты түсініктеме бермеді.
Ал адвокат Айгүл Айжарықова 4 маусымда кешке қарай белсендіге кіріп шыққанын айтты.
“Тергеуден бас тарттық. Себебі ол өзін кінәлі санамайды. Сосын бізді сараптамамен таныстырды. Бір күн ішінде 108 грамм апиын табылған деп сараптама шығарып қойыпты,”- деді адвокат Айгүл Айжарықова.
3 маусымда Ақтауда белсенді Мұратбай Жұмағалиевтің ұсталғаны белгілі болған еді. Полицияның хабарлауынша, белсендіден “есірткі табылып, тәркіленген”.
Әлеуметтік желіде тараған видеода қара киген арнайы жасақтың белсендіні ұстағаны көрінеді. Видеолардың бірінде белсендінің «қалтама салып жіберді мыналар. Подстава жасап жатыр» деген сөзі естіледі. Ал жанындағы адам «мен саған қолымды да тигізбедім» дейді.
Туыстары мен достары белсендінің ұсталуын оның қоғамдық мәселелерді ашық айтып жүргенімен байланыстырады.
