Ақтауда қоғамдық белсенді Мұратбай Жұмағалиев ұсталып, полиция осы оқиға туралы түсініктеме берді.
Бұл туралы Azattyq — Азаттық телеграм арнасы хабарлады.
“Маңғыстау облысының полиция қызметкерлері жедел-профилактикалық шара кезінде Жаңаөзен қаласының 45 жастағы тұрғынын ұстады. Жеке тінту кезінде ер адамнан ерекше көп мөлшерде есірткі заты табылып, тәркіленді. Бұған қоса, медициналық айғақтау ұсталған адамның есірткі қолданғанын растады” деп жазылған полицияның хабарламасында.
Полицияның айтуынша, қылмыстық іс қозғалып, ұсталған ер адам уақытша ұстау изоляторына қамалған. Қазір тергеу жалғасып жатыр.
Бұған дейін Ақтауда белсенді Мұратбай Жұмағалиевтің ұсталғаны белгілі болған. Әлеуметтік желіде тараған видеода қара киген арнайы жасақтың белсендіні ұстағаны көрінеді. Видеолардың бірінде белсендінің «қалтама салып жіберді мыналар. «Подстава» жасап жатыр» деген сөзі естіледі. Ал жанындағы адам «мен саған қолымды да тигізбедім» дейді.
Туыстары мен достары ұстауды қоғамдық мәселелерді ашық айтып жүрген Мұратбай Жұмағалиевтің белсенділігімен байланыстырады.
