Қазақстан ұлттық қауіпсіздік комитеті (ҰҚК) бельгиялық инвестор Фрэнк Монстрейге іздеу жариялады.
Бұл туралы ҚазТАГ агенттігі хабарлады.
«Монстрей Фрэнк Джозеф. Екі күннен бері іздеуде. Туған күні: 22 сәуір 1965 жыл, жынысы: ер, шетел азаматы, өзге ұлт өкілі. 2026 жылғы 20 мамырдағы іздестіру ісі «Астана» өңірінде тіркелген. Бастамашы: ҚР ҰҚК. Іздеу салушы орган: ҚР ҰҚК сыбайлас жемқорлыққа қарсы іс-қимыл қызметі», — делінген Қазақстанның құқықтық статистика және арнайы есепке алу органдарының порталындағы Монстрейдің іздеу карточкасында.
Монстрей 2010 жылы мұнай мен газ конденсаты кен орындарын барлау және игерумен айналысатын Zhaikmunai компаниясының 40,5% үлесіне иелік еткен, сондай-ақ, Nostrum Oil компаниясы акционерлерінің бірі болған.
Тengrinews ақпараттық ресурсының дерегінше, Фрэнк Джозеф Монстрей бельгиялық кәсіпкер және инвестор, бұрынғы мұнай магнаты ретінде сипатталады. Ол 2000 жылдардан бастап бұрынғы кеңестік елдерде, соның ішінде Қазақстанда белсенді жұмыс істеген.
Оның Қазақстандағы негізгі бизнес-жобасы Nostrum Oil & Gas (бұрынғы «Жайықмұнай») мұнай-газ компаниясы болды. Кейін ол компанияны Лондон биржасына шығарып, мұнай-газ секторынан кеткен делінеді.
Бірқатар жарияланымда Фрэнк Монстрейдің есімі Қазақстанда сырттай сотталған оппозициялық саясаткер Мұхтар Әблязовпен ықтимал байланысы және Nostrum Oil & Gas компаниясының активтеріне қатысты даулар төңірегінде аталған.
Kiar.center мәліметінше, 2017 жылы Лондонның Жоғарғы соты БТА Банкінің Әблязов пен басқа да жауапкерлерге қарсы ісі аясында бастаған талқылаулар аясында Монстреймен байланысты компаниялардың акцияларымен жасалатын операцияларға шектеу қойған.
