18 мамырда Алматыда Абай театрында қайраткер ақын Олжас Сүлейменовтің 90 жасқа толға мерейтойына арналған салтанатты кеш ұйымдастырылды. Алайда денсаулық жағдайына байланысты ақын өзіне арналған кешке қатыса алмады.
Шараға келген көрерменнің көпшілігі ақынды көзбен көруге ықыласты екендігін білдіріп жатты.
Салтанатты жиынға зиялы қауым өкілдері, ақын-жазушылар, мәдениет қайраткерлері, шенеуніктерден тыс Олжас поэзиясы мен азаматттығына тәнті болған көпшілік жиналды.
Жиында Алматы қаласы әкімінің орынбасары Абзал Нүкенұлы ел басшысы Қасым-Жомарт Тоқаевтың құттықтау хатын оқып, ақынның ел тарихы мен мәдениетіне қосқан үлесін атап өтті. Бұған қоса әдебиет, мәдениет өкілдері мен бірқатар белгілі тұлғалар да құттықтау, тілектерін білдірді.
Кештің соңы концерттік бағдарламаға ұласты.
Олжас Сүлейменов 1936 жылы 18 мамырда Алматы қаласында дүниеге келген. Әуелде геология саласында білім алды. Алайда шығармашылыққа деген құштарлығы оны әдебиет әлеміне алып келді. Мәскеудегі Горький атындағы Әдебиет институтында білім алған жас ақын 1959 жылдан бастап әдеби ортаға кеңінен таныла бастады.
Олжас Сүлейменовтің есімін әлемге алғаш танытқан шығармалардың бірі – ғарышқа алғашқы адамның ұшуы әсерінен жазылған «Адамға табын, Жер, енді!» поэмасы. Ал 1975 жылы жарық көрген «Аз и Я» кітабы кеңестік кезеңдегі ең батыл еңбектердің біріне айналды. Автор бұл зерттеуінде түркі және славян халықтарының тарихи-мәдени байланысын тың қырынан талдап, «Игорь полкі туралы жырдың» астарындағы түркілік белгілерді саралап, орыс әдебиетінде қалыптасқан бірқатар мифке соққы берді. Кітап жарық көргеннен кейін Мәскеуде үлкен пікірталас туып, «Аз и Я» кітабының таратылуына тыйым салынды. Ал автор бірнеше жыл бойы саяси қысымға ұшырады. Соған қарамастан, «Аз и Я» түркі халықтарының тарихи санасын жаңғыртып, ұлттық рухтың күшеюіне зор ықпал етті.
Олжас Сүлейменов тек ақын ғана емес, қоғам өмірінде де белсенді қызмет атқарған тұлға. Ол халықаралық деңгейде ядролық қаруға қарсы қозғалыстарды қолдап, адамзат қауіпсіздігі мәселелерін көтерді. Әсіресе Семей ядролық полигонын жабуға бағытталған «Невада – Семей» қозғалысының бастамашысы ретінде ел тарихында ерекше орын алды. Олжас Сүлейменовтың Желтоқсан оқиғасында зардап шеккендерді анықтап, ақтаудағы еңбегі әзірге қоғамда аталмай келе жатыр. Алаш «ақтаңдақтарын» ақтауда ақын демократиялық қадамға барды. Желтоқсан оқиғасы тұсында Жазушылар одағы басқарған ол қоғамдағы жаңа қатынасты оңынан қабылдап, ақиқаттың шалуына ұйытқы болды.
Сонымен қатар ол саяси қызмет атқарып, кейін билік жағына өтіп, дипломатияда да өзінің қайраткерлігін танытты. Тәуелсіздік алған соң Халық конгрессі партиясын құрған ол президент сайлауына қатысатынын жариялаған еді. Алайда кейін Францияға дипломатиялық қызметке жіберілді. Ол Қазақстанның ЮНЕСКО-дағы өкілі болып қызмет атқарды.
