16 мамырда Astana LRT жүйесі іске қосылды. Ресми ақпаратқа қарағанда, LRT жүйесінің әр құрамы 600-ден астам жолаушы тасымалдай алады. Ұзындығы 22,4 шақырым болатын желі арқылы 15 құрам жүргізушісіз жүреді. Басқару, жылдамдықты арттыру және тежеу, есікті ашу үдерістері, сондай-ақ төтенше жағдай кезіндегі әрекеттер толығымен автоматтандырылған.
Бағыт бойынша кететін уақыт – шамамен 40 минут. Құрамдар сағатына 50-60 шақырым орташа жылдамдықпен 5-6 минут сайын жүреді. Транспорт таңғы алтыдан түнгі 23:00-ге дейін қатынайды. Билет құны 200 теңге болмақ.
Ресми мәліметке қарағанда, қазір LRT жобасының екінші кезегі де жүзеге асырылып жатыр.
Азаттық радиосы Astana LRT жүйесінің іске қосылуы президент Қасым-Жомарт Тоқаевтың туған күнімен тұспа-тұс келгеніне назар аудартады. 17 мамырда Тоқаев 73-ке келеді. Бұған дейін ол туған күнін тойламайтынын және өзінің туған күніне орай мерекелік іс-шаралар қажет емес екенін айтқан.
LRT – Қазақстандағы ең даулы жобалардың бірі. Алғаш рет 2011 жылы сол кездегі президент Нұрсұлтан Назарбаевтың туған күні қарсаңында, 4 шілдеде Астанада LRT құрылысы формальды түрде басталған. Сонда құрылыстың 2 жарым жылдың ішінде салынатыны айтылған. Кейін Назарбаев оның қымбатқа түсетінін айтып, құрылыс тоқтаған. 2017 жылы құрылыс қайта басталмақшы болып, кейін жалғаспаған. 2019 жылы Қасым-Жомарт Тоқаев жоғары билік басына келгеннен кейін LRT құрылысы «оңтайландырылған». Осы аралықта қаржы тапшылығы және осы құрылысқа қатысты жемқорлық дауы LRT-ның салынуына кедергі болып келген.
2021 жылы қарашада сыбайлас жемқорлыққа қарсы іс-қимыл агенттігі Астана LRT компаниясы басқармасының бұрынғы төрағасы Талғат Ардан Стамбұлда екенін, оны ұстау шаралары жүріп жатқанын мәлімдеген. Бұл іс бойынша тағы бір айыпталушы Астана әкімінің бұрынғы орынбасары Қанат Сұлтанбеков АҚШ-та екенін, АҚШ-пен экстрадиция бойынша екіжақты келісім жоқ болғандықтан оны елге қайтару мүмкін еместігін айтқан. Сот бұл екеуін сырттай қамауға санкция берген.
Былтыр мамырда Талғат Ардан Түркияда ұсталғаны мәлім болды. Сол айда LRT-дағы ақша жымқыру ісі бойынша бір топ адамға үкім шықты.
