Бастамашыл топ Қазақстанда «Әділет» атты жаңа саяси партия құрылатыны туралы мәлімдеме жасады.
15 сәуірде бастамашы топтың жиынынан кейін жаңа партия «прогрессивті реформаларды», «Әділетті Қазақстан» құру идеясын қолдайтынын», «заң үстемдігін нығайтып, шешім қабылдау процесіне азаматтардың қатысуын кеңейтуді көздейтінін» жариялап отыр. Партия мәлімдемесінде жаңа Конституция қағидаттары мен ел құндылықтары негізінде ел азаматтарының құқықтарын, бостандықтары мен мүдделерін қорғау негізгі мақсат пен міндет ретінде көрсетілген.
«Біз экономикасы мықты, баршаға кең мүмкіндік беретін және әлемдік қоғамдастықта беделді Әділетті мемлекетті құру және нығайту үшін барлық жауапты азаматтардың күш-жігерін біріктіргіміз келеді», — делінген мәлімдемеде.
«Әділет» атауын иемденген партия өзінің басым бағыттары ретінде мыналарды атаған: барша қазақстандықтар үшін тең мүмкіндік қамтамасыз ету және кландық, өңірлік айырмашылықтардың ықпалын азайту; тәуелсіз, тиімді және объективті құқық қорғау және сот жүйесі және экономикалық адалдық пен елдің тұрақты дамуы.
16 сәуірде бастамашыл топ Әділет министрлігіне тіркеуге дайындық рәсімін бастау туралы өтініш жолдап, жақын арада құрылтай съезін өткізбек.
Бастамашыл топ құрамына «Әділ сөз» сөз бостандығын қорғау халықаралық қорының президенті Қарлығаш Жаманқұлова, «Қазақ тілі» халықаралық қоғамының президенті Рауан Кенжеханұлы, саясаттанушы Марат Шибұтов, «Қ.Жұбанов атындағы Ақтөбе өңірлік университеті» КЕАҚ басқарма төрағасы – ректоры Лаура Қарабасова, Бала құқықтары жөніндегі уәкіл Динара Зәкиева, «YNTYMAQ» шағын және орта бизнес қызметкерлерінің қазақстандық салалық кәсіптік одағы» РҚБ Павлодар облыстық филиалының төрайымы Гүлзира Атабаева, саясаттанушы Бөріхан Нұрмұхамедов, «Qazaqstan» РТРК тележүргізуші-журналисі Ирина Тен, «Қазақстан халқына» қоғамдық қорының басшысы Ләззат Шыңғысбаевалар байқалған. Бұған қоса «Аllur» және «Qarmet» тәрізді алпауыт компанияның басшысы Андрей Лаврентьев пен бизнестің басқа да салаларынан Айғазы Құсайынов және Ренат Бектұровтар да бастамашы топта болған.
«Әділет» атымен саяси партия бұрын да болғаны белгілі. 2004 жылы «Қазақстан демократиялық партиясы» ретінде құрылып, 2006 жылы атауын «Әділет» демократиялық партиясы деп өзгерткен ұйым парламент сайлауына түскенімен өте алмаған. 2013 жылы «Әділет» партиясы «Руханият» партиясымен жаңа «Бірлік» саяси партиясына біріккен. 2020 жылдың қарашасында партия атауын ADAL деп өзгерткен соң, 2021 жылғы мәжіліс сайлауына қатысып, 3,57 пайыз ғана дауыс жинап, тағы да парламентке өте алмаған. Ал Қаңтар оқиғасынан кейін, 2022 жылғы желтоқсанда ADAL биліктегі «Amanat» партиясына қосылып, дербес саяси ұйым ретінде қызметін доғарды.
Президент Қасым-Жомарт Тоқаев 10 сәуірде ғалымдарды марапаттау кезінде тамыз айында жаңа Коснтитуция бойынша бір палаталы парламент Құрылтай сайлауы өтетінін жариялаған болатын. «Сайлау биыл тамыз айында өтеді. Мұны әдейі ерте айтып отырмын. Өйткені партиялардың жоспарларын айқындап, сайлау науқанына дайындық жүргізуіне жеткілікті уақыты болуы керек,»- деген президент Тоқаев Ақордада ғалымдармен кездесуінде.
