Павлодардағы әскери бөлімдердің бірінде келісімшарт бойынша қызмет атқарып жүрген екі әскери қызметкердің бірі оқ тиіп қаза тауып, екіншісі ауыр жараланған. Бұл туралы бейсенбі күні Pavlodarnews сайты хабарлады.
«Алдын ала мәлімет бойынша, әскери қызметкер өзіне бекітілген қарудан оқ атып, салдарынан сол жерде қаза тапқан, ал екіншісі жараланған,»- деп жазған онлайн-басылым ішкі істер министрлігінен алған ақпаратқа сүйеніп.
Мәліметке қарағанда, зардап шеккен адам шұғыл ауруханаға жеткізілген. Қазір ол Павлодар қаласындағы №1 аурухананың жансақтау бөлімінде жатыр. Дәрігерлер оның жағдайы ауыр, бірақ тұрақты дейді.
Әлеуметтік желіде тарап жатқан бейресми ақпарат бойынша, төтенше оқиға 15 сәуір күні сағат 18:40 шамасында, №6679 әскери бөлімінің қызметкерлері сот қарауылынан автозакпен қайтып келе жатқанда болған. Ресми орындар әзірге бұл қазалы оқиғаның егжей-тегжейі жайлы басқа ақпарат жариялаған жоқ. Ішкі істер министрлігі Павлодардағы оқиғаға байланысты қылмыстық іс қозғалып, сотқа дейінгі тергеу амалдары басталғанын хабарлаған.
Елде кейінгі жылдары әскери қызметшілер мен курсанттар арасында өлім-жітім жиіледі. Әскери бөлімдер сарбаздар өлімін көбіне суицидпен, жеке отбасылық мәселелермен және денсаулық жағдайымен байланыстырады. Бірақ марқұм болған сарбаздардың туыстары мұнымен келіспей, балалары кісі қолынан қаза тапты деп күдіктенеді.
