Түркия қарашада Ресейдің Urals мұнай маркасын импорттауды күрт азайтқан. Бұл туралы Kpler және LSEG сараптамалық платформасының деректеріне сілтеп Reuters агенттігі хабарлады.
Сараптама платформалары Анкара бұл әрекетке Ресейдің «Роснефть» пен «Лукойл» мұнай компанияларына санкция салынған соң көшті деп топшылайды.
Сарапшылардың мәліметінше, Түркияда қарашада қазанмен салыстырғанда Urals маркасын күніне 100 мың баррель аз тасымалдаған. Қазан айында Түркия Ресейдің Urals маркасын күніне 200 мың баррель алған.
2022 жылы Еуропа тарабы Ресей мұнайынан бас тартқан соң Түркия Үндістаннан соң Urals маркасын алатын ірі елге айналған еді.
Kpler дерегіне сай, Түркия Urals маркасын тасымалдауды азайтқан тұста Қазақстанның CPC Blend және KEBCO мұнай маркаларын, Ирактың Basrah маркасының импортын көбейткен.
Мысалы, қарашада Түркия Қазақстанның CPC Blend маркасын күніне 105 мың баррельден тасымалдаған. Бұл – 2024 жылдың ақпанынан бергі ең жоғарғы импорт деңгейі.
Reuters агенттігінің жазуынша, Каспий құбыр консорциумына (КТК) жасалған шабуыл CPC Blend маркасының тасымалына теріс әсер етуі мүмкін. Ресей аумағынан өтетін КТК құбыры бірнеше рет Украинаның шабуылына ұшыраған. Ал Қазақстан мұнайының 80 пайыздайын осы құбыр арқылы тасымалдайды.
