28 қарашада Астанадағы ауыл әкімдерінің жиынында Қазақстан президенті Қасым-Жомарт Тоқаев «жаңа Конституция» туралы айтты.
“Жалпы, Конституциямызға енгізілетін түзету өте көп болуы мүмкін. Сондықтан референдум барысында халық жаңа Ата Заңға дауыс беретін болады деп айтсақ, қателеспейміз” деді Тоқаев.
Президент биылғы халыққа жолдауында бір палаталы парламент құруды ұсынып, 2027 жылы Конституцияға енгізілетін тиісті өзгерістерді жалпыұлттық референдумға шығаруды айтқан еді.
Тоқаев мәжілістің қазіргі құрамы барлық заңды рәсімдер аяқталғанша, ал сенат жалпыұлттық референдум қорытындысы шығып, жаңа парламент сайлауы өткенге дейін жұмыс істей береді деп айтқан.
Ол жұма күнгі жиында осы ойын жалғастырып, «нағыз кәсіби парламент жасақтау» қажеттігін айтты.
«Парламенттік реформа – екі палатаны жай біріктіре салу деген сөз емес. Меніңше, депутат санын тым көбейтудің қажеті жоқ. Керісінше, оңтайландыру керек, парламенттің жұмысын жетілдіру қажет. Мысалы, бір палаталы жаңа парламентте президент квотасы болмайды. Барлық депутаттар бірдей тәртіппен сайлануы қажет. Бұл – алдағы аарламенттік реформа аясында жасалатын аса маңызды қадам» деді ол.
Ол өз сөзінде елде «тыныштық, тұрақтылық болуы керек, құқық қорғау органдары өз кәсібилігін көрсетуі қажет» деді. Сөз арасында «арандатушыларға немесе «лас, көлеңкелі» саясатпен айналысқысы келетін адамдарға жол бермейміз» деді, бірақ ол арқылы кімді меңзегенін айтпады және нақты адамдардың аты-жөнін атамады.
Қазақстанда қос палаталы парламент елдің бірінші президенті Нұрсұлтан Назарбаевтың тұсында, 1995 жылғы 30 тамызда бүкілхалықтық референдумда қабылданған Конституцияға сәйкес құрылып, алғашқы құрамы 1996 жылы сайланған. Содан бергі өткен уақыт ішінде құрамы сегіз рет жаңарған сенат 50 депутаттан тұрады: 40-ын жергілікті мәслихаттар жанама жолмен сайлайды, қалған он депутатты президент тағайындайды.
