Жамбыл облыстық полиция департаментінің басшысы Бақытжан Малыбаев осы қызметке тағайындалғанына жыл толғанда жұмыстан кетті.
Orda.kz сайтының дереккөздерге сілтеме жасап хабарлауы бойынша, аймақтағы полицей басшының отставкаға кетуін президент әкімшілігі бақылауда ұстаған. Оның кетуі туралы сыбыс тамыз айынан бері тарап жүрген.
Жамбыл облысының полиция бастығының қызметтен кетуіне оның орынбасары Жайдарбек Құттыбаевтың ұсталғаны себеп болуы мүмкін. Биылғы 30 тамызда ұсталған ол алаяқтық жасады деп айыпталуда. Сонымен қатар, Малыбаевтың тұсында қоғамдық тәртіп нашарлады. Мысалы, жол апаты, кісі өлтіру және зорлау саны күрт өсті, профилактика шаралары сәтсіз болды, тергеушілердің жұмысына шағымдар түсті. Сонымен қатар, Малыбаев тергеліп жатқан орынбасары Құттыбаевты қолдаған, бұл да оның беделіне нұқсан келтірді.
Осы оқиғалар аясында Малыбаевтың қызметтен кету туралы рапорт жазғаны хабарланған.
Бақытжан Малыбаев бұл қызметінен бұрын Көліктегі полиция департаментінің бастығы болған. Одан алдын Астана полициясындағы әртүрлі қызметі кезінде бейбіт митингілерді күштеп таратып, ақпарат бермеуімен танылған еді. Ол былтыр қыркүйекте Жамбыл облысы полициясы департаментінің басшысы болып тағайындалған. Енді ол тағайындалған уақытында қызметінен кетіп отырған жайы бар.
