Бүгін Астанада Еуропа Одағының санкциялар жөніндегі халықаралық арнайы өкілі Дэвид О ‘ Салливан баспасөз мәслихатында Қазақстан билігімен Ресей санкциялары туралы талқыланғанын айтты. Бұл туралы Ulysmedia хабарлады.
О ‘ Салливан Қазақстан премьер-министрінің орынбасары Серік Жұманғаринмен кездесуіне тоқталған. Айтуынша, Қазақстан қазір күн тәртібінде тұрған бірнеше проблемалық сәттерді өткеріп жатыр. Сондай мәселенің бірі қазақ мұнайы экспортының негізгі бағыты КҚК-ге (Каспий құбыр консорциумы) қатысты болып отыр.
Сондай-ақ, ол бірлескен келіссөздер арқылы ЕАДБ (Еуразия даму банкі) активтерін бұғаттан шешуге қол жеткізілгенін де хабарлады.
«Тағы бір маңызды мәселе Еуразиялық даму банкінің бұғатталған активтері болды. Біз бұл мәселемен жұмыс істедік, осы жұмыстың және бельгиялық әріптестердің көмегінің арқасында біз бұл активтерді бұғаттан босаттық, енді олар Қазақстанда іске асырылатын жобаларға бағытталатын болады», — деді ол.
Дэвид О ‘ Салливан Еуропа Одағының Қазақстаннан Ресейге санкциялық тауарлардың қайта экспортталуына алаңдап отырғанын да айтты.
«Біз қайта экспорттау бағытына алаңдаймыз. Үлкен экспорттың жүріп жатқанын көріп отырмыз. Басынан бастап Қазақстанның санкцияларға қосылмау туралы шешімін құрметтейтініміз жайында ұстанымымыз жарияланды. Бар сұрайтынымыз — бұл G7 елдерінің санкцияларын айналып өтуге мүмкін беретін ел болуға жол бермеу. Біз мұндай жағдай болмайтынына және әскери мақсаттағы бұйымдар Ресейге қайта бағытталмайтынына кепілдік берілгеніне қуаныштымыз», — деп қосты ол.
Еске сала кетейік, 13 маусымда АҚШ Қаржы министрлігінің есебінен кәсіпорындардың санкциялық тізіміне қазақстандық «КБР-Технологиялар” компаниясы енгізілгені белгілі болды. Компания Ресейге жоғары технологиялық жабдықтар мен дрондарды жинауға арналған компоненттерді жеткізген.
12 маусымда KASE акцияларының 13,1 пайызына иелік ететін Мәскеу биржасы АҚШ санкциясына ұшырады. Мәскеу биржасы — Қазақстан қор биржасының (KASE) ірі акционерлерінің бірі.
