Қазақстандағы бай рантье адам Айдан Сүлейменова Ресей паспортынан бас тартты. Бұл туралы Tengrinews хабарлады.
11 шілдеде Ресей президенті Владимир Путин «Ресей азаматтығына қабылдау және Ресей азаматтығынан шығу туралы» жарлыққа қол қойды. Құжатқа сәйкес, Айдан Сүлейменова ресейлік паспорттан бас тарту туралы өтініш берген.
Айдан Сүлейменова – Қазақстанның тұңғыш cыртқы істер министрі Төлеутай Сүлейменовтің қызы және қазақстандық кәсіпкер Данияр Әбілғазиннің әйелі.
Forbes мәліметінше, Сүлейменова ADD Invest Properties компаниясының иесі болып табылады, осы арқылы ол ерлі-зайыпты Құлыбаевтармен бірге астаналық Keruen City сауда орталығы мен Talan Gallery сауда орталығына иелік етеді және Keruen City сауда орталығындағы үлеске ие. Серіктестік қоржынында Ақтөбедегі Keruen City сауда орталығының 50 пайызы да бар. Айдан Сүлейменова «Аяла» қайырымдылық қорын да басқарады.
2023 жылдың соңында Сүлейменова 4,3 миллиард теңге табыспен ең табысты рантье рейтингінде сегізінші орынды иеленген.
Рантье деп — несиеге берілген ақша капиталынан немесе бағалы қағаздардан түскен табыспен өмір сүретін адамдарды айтады.
Бұған дейін олигарх Данияр Әбілғазин мен әйелі Айдан Сүлейменованың Грекияда яхта жалға алғанын белгілі болған еді.
21 маусымда яхта экипажы Гидра аралындағы өртке байланысты ұсталған. Белгілі болғандай, туристер жалдамалы яхтада отшашу атқан. Салдарынан қарағайлы орман өртке оранған болатын. Арал мэрі Джоргос Кукулаки шетелдіктерді сотқа беретінін мәлімдеді. Күдіктілердің арасында қазақстандық кәсіпкер мен оның әйелі де болған. Алайда Әбілғазин мәлімдеме жасап, өртке қатысы жоқтығын айтты.
