Украина астанасында қастандыққа ұшыраған қазақстандық журналист Айдос Садықовты өлтіруі мүмкін күдіктілердің есімі аталды. Оның біреуі Қазақстан полициясында қызмет атқарған адам екені айтылады. Бірақ оны Қазақстанның ішкі істер министрлігі жоққа шығарып, мәлімдеме жасады.
Киевте тұратын журналист Айдос Садықовты 18 маусым күні үйінің жанында көліктің ішінде әлдебіреулер атып кеткен болатын.
Ол қазір ауруханада жатыр, жағдайының өте ауыр екені айтылады.
Айдос Садықовтың әйелі Наталья Садықованың айтуынша, Украина полициясы осы қылмысқа қатысы бар адамдарды тапқан.
Олар — 33 жастағы Мейрам Қаратаев пен 36 жастағы Алтай Жақанбаев. Екеуі 2 маусымда Киевке келіп, пәтер жалдап тұрған.
Айтуынша, Мейрам Қаратаев — Қостанай облысы полиция департаментінің қызметкері.
Дегенмен бүгін ішкі істер министрлігі бұл ақпаратты жоққа шығарды.
— Азамат М.Қаратаевқа қатысты оның 2019 жылдың қаңтар айында ішкі істер органдарынан босатылғанын және қазіргі уақытта полиция қызметкері емес екенін хабарлаймыз. Қазір біз Мемлекет басшысының тапсырмасымен істің бүкіл мән-жайын анықтау үшін тиісті жедел іс-шаралар жүргізіп жатырмыз, — деп хабарлаған ведомстводан.
18 маусымда Украина астанасы Киевте белгісіз біреу қазақстандық журналист, оппозициялық белсенді, Youtube желісіндегі «Бәсе» каналының авторы Айдос Садықовты үйінің маңында көлігінде отырған кезде атып кеткен. Айдостың қасында болған әйелі Наталья Садықова зардап шекпеген. Украина бас прокуратурасы Қазақстан азаматына «қасақана өлтіру мақсатында қастандық жасау» фактісі бойынша сотқа дейінгі тергеу амалын бастағанын мәлімдеген.
