Германияның Оңтүстік Гессен полициясының бас басқармасы Қазақстан азаматы Айгүл Сайлыбаеваның өліміне қатысты сұраққа жауап берді.
«16 маусым күні түстен кейін Эрлах көлінің маңында адам денесі табылғаннан кейін прокуратура мен полиция бұл 2024 жылғы 4 маусымда із-түзсіз жоғалған 40 жастағы әйелдің денесі деп болжап отыр», — деді Оңтүстік Гессен полициясының бас басқармасы.
Осы уақытқа дейін жүргізілген тергеу жұмыстарының нәтижесінде әйел зорлық-зомбылық құрбаны болғаны белгілі болған.
Бірақ қылмысқа не себеп болғаны белгісіз.
Кісі өлімін қосымша тергеу үшін Оңтүстік Гессен полициясының бас басқармасы комиссия жасақтаған. Тергеу амалдарына 35-тен астам шенеунік тартылды.
Адам денесі табылған аумақта қосымша іздестіру жұмыстары жүргізілмек. Тергеушілер қылмыс мәйіт табылған жерде жасалмаған деп болжап отыр.
Тергеушілер кісі өлтіруді тергеумен қатар, із-түзсіз жоғалған Айгүлдің 49 жастағы қайын енесін іздеу амалдарын жалғастырып жатыр.
Екі әйелдің жоғалып кетуі мен кісі өлтіру арасындағы байланыстың қаншалықты ықтимал екені әзірге белгісіз және тергеліп жатыр.
«Эрлахе» кісі өлтіру бөлімі халықтан ақпарат алу үшін жеке телефон желісін құрды: 06151/969 53200, азаматтар есімдерін атамай ақпарат беру үшін осы нөмірге хабарласа алады. Қазіргі уақытта тергеушілер 4 маусымнан бері қылмысқа қатысы болуы мүмкін куәгерлерді іздестіріп жатыр. Тергеу жүргізіліп жатқандықтан, әзірге осы баспасөз хабарламасынан басқа ақпарат беру мүмкін емес. Баспасөзбен жұмыс істеу Дармштадт прокуратурасының құзыретіне жатады», — дейді Оңтүстік Гессен полициясы.
Бұдан алды Қазақстан сыртқы істер министрлігінің ресми өкілі Айбек Смадияров ведомствоның баспасөз мәслихатында Германияда жоғалған Қазақстан азаматының туыстары Германияға жеткенін мәлім еткен.
Бұрынғы судьяның жоғалғаны туралы оның ағасы Қанат Сайлыбаев хабарлаған.
