Президент Қасым-Жомарт Тоқаев жұмыс сапарымен Алматы облысында өндірістік және әлеуметтік нысанды аралап, Алатау қаласын дамыту жөнінде кеңес өткізді.
Мәліметтерге қарағанда былтыр өңірлік жалпы өнім көлемі 6,7 триллион теңге болып, 5,4 пайызға өскені айтылды. Президент облыс активімен кездесуде кемшіліктерді атап көрсеткен. Әсіресе, облыс орталығы Қонаев қаласын дамытуға қатысты жұмыстар Тоқаевтың көңілінен шықпағаны байқалады. Ауыл шаруашылығы саласына қатысты да сын айтылды.
«Инвестиция тарту жұмысы белсенді түрде жүргізіліп жатыр. Жыл басынан бері облыс экономикасына 266,2 миллиард теңге инвестиция салынды. Өнеркәсіп өндірісінің көлемі шамамен 900 миллиард теңгеге жетті.Бірақ, аграрлық сектордың әлеуеті әлі де толық игерілмей жатыр. Биылғы 4 айдың нәтижесі бойынша ауыл, орман және балық шаруашылығының нақты көлем индексі 101,2 пайыз болды,» — деген президент Тоқаев.
Президент аймақ басшысы Марат Сұлтанғазиев пен оның командасының жұмысын өткір сынаған.
«…Бір олқылыққа назар аударғым келеді. Қонаев қаласындағы инфрақұрылым құрылысы өте баяу жүргізіліп жатыр. «Баяғы жартас – сол жартас», қаланың келбеті өзгеріссіз күйде.Бұл қалада шұғыл түрде театр, стадион, әкімшілік ғимараттары мен мектептер салу керек. Онсыз Алматы облысы өз аяғына тұрып кете алмайды. Облыс басшылығы осы өзекті мәселелерге баса назар аударуы қажет, — дейді Қасым-Жомарт Тоқаев.
Президент Алматы облысына жұмыс сапары барысында өткен кеңесте Қазақстанды «Штрафстан» немесе «Айыппұлстан» деп атайтын азаматтарды да сынаған
Президенттің айтуынша, мұндай пікірлерді елге құрметсіздікпен қарайтын адамдар айтады. Ол олардың арасында, өкінішке қарай, парламент депутаттары да бар екенін атап өтті.
«Кейбір адамдар, өкінішке қарай олардың арасында парламент депутаттары да бар, елімізге деген сүйіспеншілігі аз болғандықтан немесе оған менсінбей қарайтындықтан құқықтық шараларымызды “Штрафстан” немесе “Айыппұлстан” деп атайды. Мұндай адамдар өз көзқарастарының тарлығын көрсете берсін. Ал біздің халқымызға қоғамдық тәртіп пен қауіпсіздік қажет. Сондықтан біз бұл бағыттан айнымаймыз және “Заң мен тәртіп” қағидатын табанды түрде жүзеге асыра береміз», — деген Қасым-Жомарт Тоқаев.
