Қазақстан президенті Қасым-Жомарт Тоқаев Иранның БАӘ-ға жасаған зымыран және дрон шабуылын айыптады. “Соның салдарынан көптеген тұрғын қаза тауып, азаматтық инфрақұрылымға нұқсан келді. Мемлекет басшысы Таяу Шығыстағы қарулы қақтығысты одан әрі ушықтыратын мұндай әрекеттерді еш ақтауға болмайды деп санайды,”- делінген Ақорданың 10 наурыздағы хабарламасында.
Қазақстан президентінің баспасөз қызметінің хабарламасында “халықаралық даулы мәселелерді шешудің ең дұрыс жолы дипломатиялық тәсілдерге жүгіну” екені атап өтілген.
10 наурызда БАӘ билігі Иран шабуылының салдарынан қаза болғандар алты адамға жеткенін, 122 адам зардап шеккенін мәлімдеген. Арасында БАӘ, Египет, Судан, Эфиопия, Филиппин, Пәкістан, Иран, Үндістан, Бангладеш, Шри-Ланка, Әзербайжан, Йемен, Уганда, Эритрея, Ливан, Ауғанстан, Бахрейн, Түркия және өзге ел азаматтары бар.
10 наурызда БАӘ әуе қорғанысы 9 баллистикалық зымыранды анықтаған, оның сегізі атып түсірілген, ал бір зымыран теңізге құлаған. Бұған қоса, 35 дрон анықталып, 26-сы құлатылған, 9-ы ел аумағына құлаған.
28 ақпаннан бері Тоқаев Таяу Шығыстағы ахуалға қатысты бірнеше рет мәлімдеген жасаған. 1 наурызда ол Біріккен Араб Әмірліктері, Сауд Арабиясы, Қатар, Бахрейн және Кувейт мемлекеттерінің басшыларына қолдау білдіріп, “достас әрі бауырлас елдердің тәуелсіздігі мен қауіпсіздігіне нұқсан келтіруге бағытталған барлық әскери әрекетті” айыптаған. Әзербайжанның Нахчыван әуежайына ирандық дрондардың соққысын да қатаң айыптаған еді. Алайда кейінірек Иран президенті кешірім сұрап, төңіректегі елдерге шабуылдамайтынын айтқанда Қазақсан басшысы оң қабылдаған. 28 ақпанада АҚШ пен Израильдің біріккен соққысынан бері Ирандағы шиеленіс жалғасып отыр. АҚШ пен Израиль соққы жасаған сайын Иранда қарымтасын қайтаруға тырысқан. Сондайда Иран Таяу Шығыс, Парсы шығанағы аймақтарында аумақтарында АҚШ әскери базасы орналасқан елдерді атқылаған. Базаны көздеп атылды дегенмен, зымырандар мен дрондардың бейбіт тұрғындар ортасына түскені тіркелген.
