Алматы облысы Жамбыл ауданының орталығы Ұзынағаш ауылындағы ескерткіштің бүліну дерегі бойынша қылмыстық іс қозғалды. Бұл туралы облыстық полиция департаменті хабарлаған
Полиция мәліметінше, қескерткішті бүлдіру фактісі бойынша тексеру басталған.
«Қазіргі уақытта кінәлі адамдарды анықтап, ұстау үшін жедел-іздестіру шаралары қолға алынған», — делінген полиция жауабында.
Ескерткіштің бүлінгені туралы алғаш болып ресейлік «Туранарь» телеграм-арна жазған. Жазба авторлары «вандализм жасағандарды» «деколонизатор белсенділер» деп атаған. Телеграм-арна авторлары оларды «тарихи білім деңгейі төмен» деп атап, Қазақстандағы тарих оқулықтары «орыстар қазақтарды отарлады» деген көзқарасты қалыптастырады» деп пікір келтірген.
Аталған ескерткіш осымен екінші рет бүлініп отыр. Жергілікті ақпарат құралдары 2023 жылы көктемде де дәл осы суреттегідей жазу пайда болғанын жазған.
«Бұл жолғысының алдыңғы фактіге қатысы жоқ. Алдыңғысынан кейін бәрін реттеп, жасап қойған еді. Мынау — бөлек жағдай,»- деді 4 наурызда полиция өкілдері.
2022 жылы қазақстандық баспагер әрі блогер Бақытжан Бұқарбай бұл ескерткішті «Ресейлік оккупация символы» деп атап, оны алып тастауға үндеген. Бейнежазбада ол «Осы тектес стелаларды орыс империясы басып алған жеріне қоятын болған. Тақтайшаны орнатқандар импершіл көзқарастағы адамдар деуге болады. Өйткені жазу 1917 жылға дейін қолданылған орыс әліпбиімен жазылған» деген. Ресми билік бұл үндеуге жария жауап бермеген.
Ұзынағаш ауылындағы ескерткіштің ресми «Қоқандықтармен болған Ұзынағаш шайқасын еске алу құрметіне» қойылған стела аталады. Ол Алматы облысы Жамбыл ауданының орталығы Ұзынағаш ауылында, мұсылман зираты аумағында орналасқан. Тарихи деректерге сәйкес, Ұзынағаш шайқасы 1860 жылы қазанда өткен. Бұл қақтығыста генерал Герасим Колпаковский басқарған Ресей империясының әскері Қоқан хандығының жасақтарын жеңгені айтылады. Кей деректерде шайқасқа қазақ жасақтарының екі тараптан да қатысқаны көрсетіледі. Бұл шайқас Ресей империясының Орталық Азияға дендей енуіне мүмкіндік туғызды. Ал Қазақстанда тіркелген орыс-казак, славян ұйымдары ара-тұра осы ескерткіш басына жиналып тұрады.
