Энергетика министрі Алмасадам Сәтқалиев 29 қаңтарда БАҚ өкілдермен өткен баспасөз мәслихатында ақпан айында АИ-92 маркалы бензиннің бағасы 210 теңгеге дейін өсуі мүмкін екенін айтты. Бұл туралы Kazinform хабарлап отыр.
«Бірінші қадамда баға 210 теңгеге дейін қымбаттайды деп бағдарлап отырмыз. Әрі қарай неше қадам жасайтынымызды нарық реттеуі керек. Біздің міндет бағаның тұрақтылығын қамтамасыз ету болады», — дейді министр.
«Біз соншалықты бір күйрететіндей өзгеріс күтіп отырған жоқпыз. Бұған дейін бензин бағасы 400 теңгеге дейін барады екен деген ойланбастан айтылған мәліметтер тарады. Ондай өсуге жол бермейміз», — деп қосты Алмасадам Сәтқалиев.
«Мұнай өнімдерінің бағасының өсуі туралы айтсақ, бұған дейін президент жанындағы кеңес шешім қабылдап қойды. Жанар-жағармай ғана емес, сұйытылған мұнай газының бағасын да кезең-кезеңмен өсіру туралы шешім бар. Сондай-ақ, тауарлық газ бойынша да бағаның өсуімен байланысты белгілі бір межелер бар. Мұндағы басты ұстаным бағаны бақылаудың нормативтік және әкімшілік шараларды Үкіметтің қолында қалдыруға бағытталған. Яғни, аталған әлеуметтік маңызы бар тауарлар бағасының күрт өсуі болмайды», — деді ол.
Министрдің айтуынша, тауарлық газдың бағасы биылғы жазға қарай біртіндеп өседі деп шамаланып отыр. Сондай-ақ Алмасадам Сәтқалиев сұйытылған газдың бағасы 98 теңгеден ары қымбаттамайды деген мәлімет келтірді.
«Былтыр баға диапазоны 54-55 теңге болса, 59-90 теңге арасында болады. Ол енді өңірлерге байланысты. Ең жоғарғы диапазон өңірлерде 64 теңгеден 98 теңгеге дейін болады деп отырмыз, — деді энергетика министрі.
