АҚШ президенті Дональд Трамп сәрсенбіде журналистерге Ресей мен Украина арасындағы бейбітшілік келісіміне қол қоюға «Зеленский мен Путиннің бір-біріне деген өшпенділігі кедергі болып отырғанын» айтты. Трамп 8 қыркүйекте Ресей президенті Владимир Путинмен телефонмен сөйлескені туралы ақпаратты растап, екеуара әңгімені «тамаша» деп сипаттады.
Бұл туралы Азаттық радиосы хабарлады.
«Ол келісім жасағысы келеді, егер Зеленский де келісім жасағысы келсе, жақсы болар еді»,- деген АҚШ президенті.
Трамп бұған қоса соғысты тоқтатуға қол жеткізу үшін Ресейдің және Украинаның басшылығымен байланысты жалғастыруға ниетті екенін мәлімдеді.
Бірнеше күн бұрын Трамптың өкілдері Стив Уиткофф пен Джаред Кушнер Мәскеу мен Киевке барып қайтқан еді. 5 қыркүйекте олар Кремльде президент Владимир Путинмен үш сағаттан астам келіссөз жүргізген. Ал келесі күні Киевте президент Владимир Зеленскиймен кездескен.
Ақ үй өкілі кейіннен Мәскеудегі келіссөзде «алдағы апталарда жарияланатын келесі қадамдардың нақты жоспарлары» талқыланғанын хабарлады. Уитткофф пен Кушнердің сапарынан кейін Ресей де, Украина да АҚШ-тың қатысуымен үшжақты келіссөзді қайта бастауға дайын екенін мәлімдеді. Келіссөз күндерінде тараптар атысты уақытша тоқтатқанымен, қонақтар Киевтен кеткен соң шабуыл қайта басталған.
