2 қыркүйекте Алматыда құқық қорғаушылар Қаңтар көтерілісі туралы орыс тіліндегі «Ескертусіз оқ ату» кітабының екінші бөлімін таныстырды.
Бұл туралы Азаттық радиосы хабарлады.
Мәліметке қарағанда, бұған дейін осы «Стрелять на поражение» кітабын құрастырушылардың бірі “Ар.Рух.Хақ” қоғамдық қорының жетекшісі, құқық қорғаушы Бақытжан Төреғожина Азаттыққа екінші кітапқа Қаңтар бойынша сот үкімдері енгенін айтқан еді.
“Екінші кітап – хронология. Оқиғаның хронологиясы. Яғни, әрбір қалада наразылық қаншада басталды, қалай өрбіді, қай көшелерде жүрді, 4-5 қаңтарда не болды? Осының бәрін біз сот үкімдерінен алдық. Барлық сотталушыға шыққан үкімдер күшіне енген кезде олар оқиғалардың қалай болғанын іс жүзінде заңдастырды. Егжей-тегжейлі жазды. Шартты түрде айтсақ, кешкі сағат 7-де “Алматы арена” маңына жұрт жиналды, одан кейін Абай көшесімен жүрді. Алаңға жетті, атыс басталды деген сияқты,-” деген құқық қорғаушы.
2 қыркүйек күнгі баспасөз жиынында ол Қаңтар көтерілісі бойынша кейбір үкімдердің сот кабинетінен жоғалып жатқанын да аңғарғанын жеткізді.
«Егер де қазір оны құжатқа түсірмесек, ертеңгі күні аңызға айналатынын түсіндік»,- дейді құқық қорғаушы.
«Ескертусіз оқ ату» кітабының электронды нұсқасын мына сілтемеден қарап, оқуға болады. Алайда бұл сілтеме Қазақстан аумағында бұғатталғаны байқалады.
