9 шілдеде «Байтақ» жасылдар партиясының сиезі өтіп, ұйым алдағы құрылтай сайлауына ұсынатын кандидаттарын атады.
Tiek сайтының хабарлауынша, жиын басталғанда осы партияның мүшесіміз деген бір топ адам ішке кіре алмай, сыртта қалып, әлеуметтік желіге видеоларын таратты.
Жиын барысында «Байтақ» жасылдар партиясының төрағасы Азаматхан Әміртай сөйлеп жатқан кезде де саяси кеңес мүшесі Асқар Иманалиев өзі сұранып мінберге шықты. Партияның күн тәртібіне көңілі толмайтынын айтқан ол 2023 жылғы сайлаудағы нәтижеге көңілі толмайтынын білдірген.
Партияның өзге мүшелері мұны «арандату» деп бағалап, қарсылық танытып жатты. Соған қарамастан Асқар Иманалиев сөзін жалғастыра берді. Тіпті «Партия төрағасын ауыстыру мәселесін күн тәртібіне қою керек»,-деген ұсыныс айтты. Алайда, партия төрағасы Азаматхан Әміртай «партия жарғысына сәйкес барлық аймақтың өкілі болу керек»,-деп басшы ауыстыру мәселесін қабылдамауды ұсынды.
Ол ұсынысқа бір ғана адам қарсы болып, бұл мәселе күн тәрбінінен алынып тасталды. Содан кейін партиялық тізім жарияланды. Құрылтай сайлауына қатысатын кандидаттардың ішінде төрағамен сөз таластырған Асқар Иманалиев те бар. Партия алдағы парламент сайлауынан өз үміткерлерінен 51 адамды атаған.
Еске сала кетсек, «Байтақ» партиясы 2023 жылы өткен сайлау нәтижесі бойынша шектік дауыс жинай алмай, мәжіліске өте алмаған. Сол кезде де Азаматхан Әміртай жасылдар партиясының басшысы қызметінен алынып, «Байтақ»партиясының құрамынан шығарылғаны туралы ақпарат тараған. Тіпті партияның жаңа басшылары да аталғанымен, артынан Азаматхан Әміртаев оның бәрін жоққа шығарған.
