6 шілдеде президент Қасым-Жомарт Тоқаевтың Қазақстанды 30 жылдай басқарып, қызметтен кеткен Нұрсұлтан Назарбаевты туған күнімен құттықтауы жарияланды.
Президент құттықтауында экс-президенттің заманауи қазақ мемлекеттілігінің негізін қалау, экономикалық әлеуетін нығайту және халықаралық аренадағы орны мен беделін бекемдеу жолындағы тарихи миссиясы деген мәселелерге тоқталған.
Экс-президентке мықты денсаулық, ұзақ ғұмыр және бақ-береке тілеген Қасым-Жомарт Тоқаев Нұрсұлтан Назарбаевтың астананы көшіру шешімінің айрықша маңызды болғанын айтқан.
«Елорданың Сарыарқа төсіне көшірілуі Қазақстанның жан-жақты өркендеуіне тың серпін берді. Бүгінде Астана қарыштап дамып, әлемдегі көрікті шаһардың біріне айналып келеді», — делінген құттықтауда.
Президенттің бұл құттықтауы Ақорданың ресми сайтында жарияланған жоқ. Ал сайтта жарияланған тағы бір құттықтауында ел басшысы Астананы маңызды шешімдер қабылданатын бас қала ретінде атаған.
Президент Тоқаев Астананың халықаралық беделі артып келе жатқанын, өңірлік және жаһандық деңгейдегі маңызды мәселелердің осы қалада талқылануы соның дәлелі екенін жеткізді. Ол елорда жауапты азаматтық ұстанымға, «Заң мен Тәртіп» пен «Таза Қазақстан» қағидаттарына негізделген жаңа қоғамдық этиканың үлгісі болуы тиіс екенін атап өткен.
2022 жылғы Қаңтар оқиғасынан кейін Назарбаев оған дейін иеленіп келген «елбасы» мәртебесінен айрылған болатын. Президент осы оқиғадан соң Назарбаевты жеңіл айыптайтын пікірлер айтып қалғанымен, қатаң сынамаған. Алайда Назарбаев жоғары биліктен кеткеннен кейінгі кеңсесі болды делінген «кітапхана» мен Ақорда арасында салқындық пайда болған.
