Қазақстанның жаңа парламенті құрылтай сайлауы 23 тамызға белгіленді. Тиісті жарлыққа бүгін, 1 шілдеде президент Қасым-Жомарт Тоқаев қол қойды.
«Қазақстан Республикасы Құрылтайының депутаттарын сайлау 2026 жылғы 23 тамызға тағайындалсын» делінген жарлықта орталық сайлау комиссиясының сайлауға дайындық жасап, оны өткізуді ұйымдастыруы керектігі айтылған.
Бүгін, 1 шілдеден бастап Қазақстанда 15 наурыздағы республикалық референдумда қабылданған жаңа Конституция ресми түрде күшіне енді. Соған сәйкес парламенттің екі палатасы – мәжіліс пен сенаттың өкілеттігі тоқтатылды.
Парламенттік реформа туралы президент 2025 жылғы қыркүйекте Қазақстан халқына жолдауында айтқан болатын. Сол кезде Парламент бір палаталы жүйеге көшетіні, ал сенат пен мәжілістің таратылатыны жарияланды. Сонда Конституцияға енгізілетін қосымша түзетулерді әзірлейтін жұмыс тобы құрылды.
15 наурызда өткен республикалық референдумда дауыс берген азаматтардың 87,15 пайызы конституциялық реформаларды қолдағаны жарияланып, жаңа Конституция қабылданды.
2022 жылғы Қаңтар оқиғасынан кейін президент жанында консультативтік-кеңесші орган ұлттық құрылтай жұмыс істеп, қазір оның да жұмысы тоқтатылды. Жаңа Конституция бойынша ұлттық құрылтай халық кеңесіне айналды. Ол бұрынғы Қазақстан халқы ассамблеясын алмастырды. Жаңа парламентті «құрылтай» деп атауды президент ұсынған.
