27 мамырда Путиннің Қазақстанға жасаған мемлекеттік сапарына қарсылық білдірген белсендіні полиция ұстады.
Ресей президенті Владимир Путиннің Қазақстанға сапарына қарсылық білдірген Көкшетау белсендісі Марат Жанұзақовты полиция ұстады. Бұл туралы белсендінің қызы Айман Жанұзақова жазған.
«Менің әкем Марат Жанұзақовты полиция қызметкерлері ұстап алып кетті», — деп жазды ол Facebook-парақшасына.
Марат Жанұзақов 27 мамырда Владимир Путиннің келуіне қарсылық білдіріп, плакат ұстап тұрған суретін жариялаған. Плакатта «Қазақстаннан кет! Слава Украине!» деп жазылған.
Көкшетау полиция әзірге бұл жағдайға қатысты түсініктеме бермеді.
Марат Жанұзақов 2024 жылы да Ресей президентінің Қазақстанға сапарына қарсылық білдірген. Ол кезде белсендіге «Ұсақ бұзақылық жасады» деп айып тағылған.
27 мамырда Ресей президенті Владимир Путин Қазақстанға мемлекеттік сапармен келді. Ол Астанаға 1,5 жылда екінші рет мемлекеттік сапармен келіп отыр.
