Президент Қасым-Жомарт Тоқаевтың жарлығымен Қызылорда облысы әкімі қызметіне Мұрат Ергешбаев тағайындалды.
60 жастағы Ергешбаев 2023 жылдан бері мәжіліс депутаты болған. Ал оған дейін Қызылорда облысында Қармақшы, Шиелі, Қазалы және Сырдария аудандарының, Қызылорда қаласының әкімі тәрізді аймақ басшылығы қызметтерін атқарған.
Мұрат Ергешбаев 1966 жылы 12 сәуірде Қызылорда қаласында дүниеге келген. 1989 жылы Алматы халық шаруашылығы институтын экономист мамандығы бойынша бітірген.
1999 жылы президент жанындағы Мемлекеттік басқарудың Ұлттық жоғары мектебінде оқуын аяқтап, мемлекеттік қызмет менеджері мамандығын алған. Ол өзінің еңбек жолын 1989 жылы Сырдария ауданындағы кеңшарда экономист болып бастаған.
1990 жылдан 1993 жылға дейін Сырдария агроөнеркәсіптік бірлестігінің өндірістік-экономикалық бөлімінің бастығы қызметін атқарған. Содан кейін маман, несие бөлімінің бастығы, «Әлем Банк Қазақстан» Қызылорда облыстық кеңсесінің бастығының орынбасары (1993-1996) болған.
1996 жылы Қызылорда облысы әкімінің орынбасарының кеңесшісі қызметінде болды. 1998 жылдан бастап «Қазақстан Халық Банкі» АҚ Қызылорда облыстық филиалын басқарды.
Кейін әлеуметтік қорғау және қаржы саласында бірнеше лауазымдарды атқарды, соның ішінде Қызылорда облысының еңбек, жұмыспен қамту және халықты әлеуметтік қорғау департаменті басшысының орынбасары (2002-2004) және Қызылорда қаласы әкімі аппаратының қаржы бөлімінің басшысы (2004-2006) болды.
2006 жылы төтенше жағдайлар министрлігінің «Өрт сөндіруші» АҚ экономика және қаржы жөніндегі вице-президенті, 2008 жылдан 2010 жылға дейін Қызылорда қаласының әкімі қызметін атқарған. Содан кейін Қызылорда облысының қаржы департаментінің басшысы (2010-2011), Қармақшы ауданының әкімі (2011-2013) және Шиелі ауданының әкімі (2013-2015) болды.
2015 жылдан 2017 жылға дейін «ҚазАгроӨнім» АҚ басқарушы директоры қызметіне тағайындалды.
2017 жылдан 2021 жылға дейін Қазалы ауданының әкімі, ал 2021 жылдан 2023 жылға дейін Қызылорда облысы Сырдария ауданының әкімі қызметін атқарды.
2023 жылдың наурыз айынан бастап AMANAT партиясының партиялық тізімі бойынша 8-ші шақырылымдағы парламент мәжілісінің депутаты.
Бұрын Қызылорда облысын басқарып келген Нұрлыбек Нәлібаев 6 мамырда премьер-министрдің бірінші орынбасары болып тағайындалған. Сол қызметті атқарып келген Роман Скляр президент әкімшілігінің жетекшісі болып бекітілді. Ал президент әкімшілігін басқарып келген Айбек Дәдебай 7 мамыр күні «Әділет» партиясының құрылтай съезінде партия төрағасы болып сайланды.
