Қоғам белсендісі Оразалы Ержанов қамауға алынып, оның үстінен референдум туралы жазбалары үшін қылмыстық іс қозғалды.
ҚазТАГ агенттігінің осы мәселе туралы сауалына 26 ақпан күні Алматы қалалық полиция департаментінің (ПД) баспасөз қызметі төмендегідей жауап берген.
«Әлеуметтік желілерде шет елдік юрисдикцияда тіркелген байланыс нөмірлерін пайдалана отырып, шындыққа жанаспайтын ақпаратты, референдумға бойкот жариялау туралы үндеулерді және азаматтарды адастыратын басқа да мәліметтерді қамтитын жарияланымдар анықталды. Сайлау құқықтарын жүзеге асыруға кедергі жасау фактісі бойынша қылмыстық іс қозғалды. Күдікті – Алматы қаласының тұрғыны ұсталды. Оның іс-әрекеттеріне түпкілікті құқықтық баға заңсыз жарияланымдардың себептері мен мән-жайларын анықтай отырып, тергеу нәтижелері бойынша берілетін болады».
Полиция «азаматтардың пікірлері мен ұстанымдарын білдіруі заңбұзушылық болып табылмайды» деп сендіреді.
«Жауапкершілік тек көрінеу жалған ақпарат таратқаны және фактілерді бұрмалағаны үшін, соның ішінде азаматтарды адастыруға және қоғамдық жағдайды тұрақсыздандыруға, азаматтардың сайлау құқықтарын жүзеге асыруына немесе сайлау комиссиясының жұмысына кедергі келтіруге бағытталған әрекеттер үшін қарастырылған», — делінген полиция мәліметінде.
Еске салсақ, 4 ақпанда журналистер Дина Елгезек пен Жалғас Ертай Қазақстан Конституциясы жобасын сынағаннан кейін өздеріне полицияның қызығушылық танытқаны туралы мәлімдеген. 22 ақпанда Астана тұрғыны Қантемір Алмышевтің бұрын Конституцияға өзгерістер енгізуді жария түрде сынағаны үшін қамауға алынғаны белгілі болды.
Ал Оразалы Ержанов осы аптада ّAra media-ның Youtube желісіндегі арнасына сұхбат берген болатын.
Қазақстанда Конституцияның жаңа редакциясы үшін референдум 15 наурызға белгіленген.
