Орал қалалық соты «Уральская неделя» газетіне «Сайлауға байланысты қоғамдық пікірге сауалнама жүргізу талаптарын бұзғаны» үшін 129 750 теңге көлемінде айыппұл салды.
Азаттық радиосының хабарлауынша, іс материалдарында Қазақстан президенті референдум 15 наурызға белгіленетінін жариялаған күні басылымның Telegram-арнасында жарияланған жазбаның соңында «Референдумға барасыз ба?» деген сұрақ берілгені айтылған. Сол күні кешке бас редактор Тамара Еслямованың үйіне екі прокурор мен бір полиция қызметкері барған. Кейін оны Батыс Қазақстан облысы прокуратурасына шақыртып, соңынан істі әкімшілік сот қараған.
Басылымның мүддесін қорғаған MediaQoldau заң қызметі сот шешіміне келіспейтіні жайлы апелляциялық шағым түсіретінін мәлімдеді. Сонымен қатар, осындай жағдайлардың қайталануына байланысты ұйым Конституциялық сотқа жүгінбекші.
2024 жылғы қазан айында да Тамара Еслямоваға атом электр станциясын салу жөніндегі референдум қарсаңында қоғамдық пікір сауалнамасын өткізу тәртібін бұзды деп айыппұл салынған. Еслямова тағылған айыпты жоққа шығарған.
Қазақстанның «Сайлау туралы» конституциялық заңында «қоғамдық пікірге сауалнаманы кемінде бес жылдық тәжірибесі бар, тіркелген заңды тұлғалар жүргізе алады және бұл туралы Орталық сайлау комиссиясын жазбаша түрде алдын ала хабардар етуге тиіс» деп жазылған.
«Алайда әлеуметтік желі сторисіндегі сұрақтарды немесе көшедегі тұрғындардан алынған пікірлерді қоғамдық пікір сауалнамасына теңестіріп бұл талаптарды журналистерге қолдану дұрыс емес. Журналист жұмысының ерекшелігі мен табиғатын ескерсек, мұндай жанрлар сауалнама бола алмайды», – деп есептейді «Құқықтық медиа орталық» қоры өкілдері.
Өткен аптада Алматы қаласының әкімшілік соты Азаттық тілшісі Мақпал Мұқанқызына да референдум тақырыбында «қоғамдық сауалнама өткізді» деп айыппұл салған. Журналисті әлеуметтік желідегі жеке парақшасына Конституция жобасы туралы референдумға байланысты «Референдумға барасыз ба?» деген сұрақ жариялағаны үшін әкімшілік жауапқа тартылған.
