Қазақстан Конституциясы жобасының тіл туралы бабына болмашы өзгеріс енгізілмек. Конституция жобасының мемлекеттік тілге қатысты 9-бабының бірінші тармағы өзгеріссіз қалады. Ал көпшілік арасында қарсы пікір тудырған орыс тілі туралы тармағында «тең» деген сөз «қатар» сөзімен алмастырылады. Бірақ қоғам оған реакция білдіріп, бұл әрекетті сынап, бұрынғыдан көп нәрсе өзгермегенін айтып отыр.
10 ақпанда Конституциялық сот төрағасының орынбасары Бақыт Нұрмұханов конституциялық комиссия отырысында осы өзгеріс туралы айтты. Конституцияның жаңа нұсқасында тілге қатысты 9-баптың екінші тармағын былай өзгерту ұсынылды.
«Мемлекеттік ұйымдарда және жергілікті өзін-өзі басқару органдарында орыс тілі ресми түрде қазақ тілімен қатар қолданылады». Қазіргі нұсқада «орыс тілі ресми түрде қазақ тілімен тең қолданылады» деп жазылған.
Елде Конституцияны реформалау бастамасы көтерілгеннен бері тіл жанашырлары, белсенділер мен жекелеген саясаткерлер орыс тіліне қатысты тармақты алып тастауды не басқаша жазуды ұсынған. Олардың айтуынша, осы тармақтың салдарынан мемлекеттік тіл өз дәрежесіне көтерілмей тұр.
