28 қаңтарда Қазақстан президенті Қасым-Жомарт Тоқаевтың елдегі банктердің бірі шетелдерге 7 триллион теңгеден (шамамен 14 млрд доллар) аса қаржыны заңсыз «жөнелткені» жайлы сөзі Ақорда сайтынан алынып қалды.
Азаттықтың хабарлауынша, басқа да бірқатар қазақстандық сайттар да Тоқаевтың осы сөзі айтылған видео мен мәтінді алып тастағаны байқалды.
Ақорда және басқа да сайттар президенттің бұл сөзін неге алып тастағанын әзірге түсіндірмеді.
Сол күні президент Тоқаев қаржы мониторинг агенттігіндегі жиында «Жақында [Қаржы мониторинг агенттігінің] төрағасы [Жанат] Элиманов қазақстандық банктердің бірі арқылы былтыр көршілес елден басқа мемлекеттерге 7 триллион теңгеден астам қаржы «жөнелтілгені» туралы баяндады,»- деген еді.
«Менің ойымша, бұл – заңға, экономикаға, тіпті саясатқа қайшы келетін ерсі жағдай. Өкінішке қарай, мұндай алаяқтық қаржы схемаларына қатысты фактілер азаймай тұр. Осыған дейін айтқанымдай, бұл кесел әлеуметтік саланы да жайлады. Мемлекет қаржысын жымқырушылардың заңды белден басқан қомағай әрекеті еш ақылға сыймайды,»- деген Тоқаев.
Президент 7 трлн теңгені шетелге қай банк жібергенін, ақша қай елдерге шыққанын ашып айтпаған.
Ертесі, 29 қаңтар таңертең президент Қасым-Жомарт Тоқаев өзінің көмекшісі әрі баспасөз хатшысы Руслан Желдібайды қызметінен босатты. Оның орнына өткен айда ғана Ақордаға ішкі саясат бөлімінің басшылығына қызметке барған Айбек Смадияров президенттің баспасөз хатшысы әрі президенттің кеңесшісі қызметіне тағайындалды. Бұл оқиғаның 7 триллион теңгенің жырына қатысы бар-жоғы белгісіз.
