27 қаңтарда Жамбыл облысында да әскери борышын өтеу барысында сарбаз қаза тапты. Бұл туралы бас прокуратура хабарлады.
Ақпаратқа қарағанда, солдат қарудан «өзіне оқ атып алған». Бұл іс бойынша ішкі істер министрлігі сотқа дейінгі тергеу бастап, жедел тергеу тобы құрылған. Солдаттың қазасын бас прокурор қадағалауына алып, Жамбыл облысындағы сарбаз қаза тапқан бөлімшеге прокурордың орынбасары, бас әскери прокурор, ішкі істер министрлігінің әскери-тергеу департаментінің басшысы жіберілген.
23 қаңтарда Өскемендегі әскери гарнизонда да бір сарбаз қаза болған. Құрлық әскері қолбасшылығы сарбаз қарауыл қызметін атқару кезінде өзіне бекітілген қарудан «өзіне оқ атып», алған жарақаттан көз жұмды деген.
Әскерде сарбаз өлімі жиілеген тұста бас прокуратура елдегі әскери бөлімдердің қауіпсіздігі тексерілетінін мәлімдеді.
«Әскерге алынған сарбаздардың өмірі мен денсаулығын қорғау, қауіпсіздік мәселесі жақын арада бас прокуратураның арнайы коллегиясында қаралады» деп мәлімдеді бас прокуратура.
